Gənc güləşçilərimiz Avropa çempionatına hazırlaşır | |
17-22 iyun 2014-cü il tarixdə Polşanın Katovitse şəhərində güləş üzrə gənclər arasında Avropa çempionatı keçiriləcək. Yığma komandalarımız çempionatda tam heyətlə iştirak edəcək. Çempionata hazırlığı davam etdirən sərbəst və yunan-Roma güləşi üzrə yığma komandalarımız Qusar Olimpiya İdman Kompleksində növbəti təlim məşq toplanışındadır. Yunan-Roma güləşi üzrə yığma komandanın üzvləri mayın 26-dan təlim-məşq toplanışına başlayıb. Böyük məşqçi Şaban Donat, məşqçilər Akif Əliyev və Zöhrab Abbasovun rəhbərliyi altında heyətdə 24 idmançı yer alıb. Təlimlər iyunun 8-dək davam edəcək. Sərbəst güləş üzrə yığma komandanın üzvləri isə, təlimlərə mayın 28-dən başlayıb. Komandanın böyük məşqçisi Arif Abdullayev, məşqçilər Rövşən Umudov və Nazim Əlicanovun rəhbərliyi altında heyətdə 21 güləşçi yer alıb. Təlim-məşq toplanışı iyunun 11-dək davam edəcək. Gənc qızlardan ibarət yığma komandanın üzvləri isə, iyunun 1-dən Astara Olimpiya İdman Kompleksində növbəti təlim-məşq toplanışına başlayacaq. Böyük məşqçi Aslan Ağayev, məşqçilər Həsrət Məmmədyarov, Siracuddin Eldarov, Arif Fərmanov və Filip Monolovun rəhbərliyi altında təlimlərə 17 gənc qız güləşçi cəlb olunub. Təlim-məşq toplanışı 2 həftə davam edəcək və iyunun 14-də başa çatacaq. |
|
Xəbər 1140 dəfə oxundu. |
|
|