Boksçumuz dünyanın ən yaxşıları sırasında

Londonda keçirilən Olimpiya oyunlarına test xarakterli turnirin gedişində Crowne Plaza otelində milli komandamızın üzvü Məhəmmədrəsul Məcidova “ilin ən yaxşı boksçusu” mükafatı verilib. Mükafatı boksçumuza AİBA prezidenti Çinq Ko Vu təqdim edib. Beynəlxalq Boks Federasiyasının rəsmi saytında superağır çəkili idmançımız haqda yazı yer alıb. “Məcidov dünyanın ən yaxşıları sırasında” adlı məqalədə Azərbaycanın dünya çempionatları tarixində 2-ci qızıl medal alması qeyd olunub: “Ağası Məmmədovun 2003-cü ildə Banqokdakı uğurundan sonra Azərbaycan növbəti qızıl medalı 8 il gözləməli oldu. Məcidov 2009-cu ildə Bakıda keçirilən “Böyük İpək Yolu” beynəlxalq turnirində yarımfinalda qazaxıstanlı İvan Dıçkoya uduzaraq, bürünc medala sahib olub. Atırau şəhərində təşkil olunmuş Utemisovun memorialında da o, 3-cü nəticə göstərib. Növbəti Umaxanov turnirində isə Məhəmmədrəsul artıq fəxri kürsünün ən yüksək pilləsinə qalxıb. O, həlledici görüşdə hazırda “Baku Fires”in heyətində çıxış edən Hacı Murtuzəliyev üzərində inamlı qələbə qazanıb. Məcidov WSB liqasında çıxış edərək öz dözümlülüyünü və fiziki hazırlığını artırmaq imkanı əldə etdi. Liqanın ilk mövsümündə 7 görüşdə qalib gələn boksçu yalnız mayda Çində keçirilən fərdi yarışlarda italiyalı Klemente Russoya cüzi üstünlüklə uduzub – 66:67. Avqustda milli komandanın heyətində təlim-məşq toplanışına qatılan idmançı yığmanın digər üzvləri ilə birgə Rusiyada hazırlıq keçib. Məcidov Bakıdakı dünya çempionatına iki asan qələbə ilə başladı. O, özbəkistanlı Sərdor Abdullayev və kolumbiyalı İsayasa Menunu nokautla məğlub etdi. Məhəmmədrəsulun gənclər arasında sabiq dünya çempionu kubalı Savon üzərində də qələbəsi parlaq alındı. Azərbaycan Yığmasının üzvü yarımfinalda vaxtilə uduzduğu İvan Dıçkonu 16:9 hesabı ilə üstələdi. Onun finaldakı rəqibi İngilis idmanının yeni ulduzu Entoni Coşua idi. 22:21 hesabı ilə qalib gələn Məcidov fəxri kürsünün ən yüksək pilləsinə qalxdı. Boksçuya qızıl medalı Azərbaycan respublikasının prezidenti İlham Əliyev təqdim etdi və o, Məcidovun qələbəsini yüksək qiymətləndirdi. Azərbaycan idmançısının növbəti hədəfi London Olimpiadasında da uğur qazanmaq olacaq”. Məcidovun mükafatlandırma mərasimindən sonrakı fikirləri belə olub: “Bü mükafatı almaq mənim üçün böyük şərəfdir. Ancaq mən bundan sonra daha məsuliyyətli olmalıyam. Mənə göstərilən etimadı doğrultmalıyam. Gələn il əsas yarış Olimpiya oyunları olacaq. Palnetin ən böyük yarışında da uğur qazanmağa çalışacam”.

Xəbər 1151 dəfə oxundu.