“Baku Fires” və “İtalia Thunder”in üzvlərinin iştirakı ilə mətbuat konfransı keçirilib

Bu gün Quba Olimpiya İdman Kompleksində Ümumdünya Boks Seriyasının (WSB) 1/4 finalının ilk görüşü çərçivəsində üz-üzə gələcək “Baku Fires” və “İtalia Thunder”in üzvlərinin iştirakıyla çəki mərasimi və mətbuat konfransı keçirilib. “İtalia Thunder”in baş meneceri Klaudio Ballor “Baku Fires”I yaxşı tanıdıqlarını deyib: “Rəqibi yaxşı tanıyırıq. Xüsusən Heybətulla Hacəliyevlə Heybulla Mürsəlovun adını çəkə bilərəm. Əbdülqədir Abdullayev də güclü boksçudu. Əslində onu heyətimizə cəlb etmək istəyirdik. Ancaq o “Baku Fires”lə anlaşmaq qərarına gəldi”. “İtalia Thunder”in baş məşqçisi Françesko Damiani də döyüşlə bağlı fikirlərini bildirib: “Sabah güclü rəqiblə qarşılaşacağıq. Azərbaycanda olduğumuz üçün məmnunuq. Hər iki komandada yaxşı boksçular rinqə çıxacaq. Minimal hesabla uduzsaq, bu nəticəni normal sayaram. Hətta 0:5 hesablı yenilgini də faciə saymarıq. Çünki bilirik ki, İtaliyada cavab qarşılaşmasında sözümüzü deyəcəyik”. Rizvan Gənciyev, “Baku Fires”in baş meneceri: “İtalyanlarla öncəki mövsümlərdən birində qarşılaşmışdıq. Yarımfinalda onlara uduzduq. Revanş şansımız var. Uşaqlara inanırıq. Gözəl qarşılaşmanın baş tutacağına əminəm. Azarkeşlər baxımlı döyüşlər izləyəcək. Cavab duelinə rahat çıxmaq üçün 5:0 hesabıyla qalib gəlməliyik”. Gənciyev “Avropa Boks Federasiyasının prezidenti Franko Falçinelli italyan olduğundan hər hansı qeyri-obyektvlik ola bilərmi” sualına belə cavab verib: “Bu məqam əleyhimizə işləməməlidir. Şükürlər olsun ki, WSB-də referilərin idarəçiliyi normaldır və hələ ki ciddi problem yaşanmayıb. Həm də cənab Falçinellinin bu komandaya heç bir aidiyyatı yoxdur. Həm də rəqib sanki dünya yığmasını xatırladır. “İtalia Thunder” müxtəlif ölkələrdən güclü boksçuları heyətinə qatıb”.. “Baku Fires”in baş meneceri WSB-nin finalının Azərbaycana təklif olunduğunu deyib: “Ukraynadakı siyasi səbəblərdən final orada olmayacaq. Artıq başqa təşkilatçı ölkə axtarılır. Bizə və Rusiyaya finala ev sahibliyi etmək təklif olunub. Hələ qəti qərarımızı verməmişik. Düşünürük. Danışıqlar davam edir. İndidən bu haqda bir şey demək çətindi”. Nuripaşa Talıbov, “Baku Fires”in baş məşqçisi: “Cavab görüşü üçün heyəti müəyyənləşdirmişik. Seçim prosesini məşqçilər korpusu edib. Bu, bizim daxili işimizdi. Ancaq heç kim zədədən sığortalanmayıb. Ciddi bir problem olmasa, İtaliyada döyüşəcək boksçuların siyahısında dəyişiklik olmayacaq”. Qonaq komandanın ən titullu boksçusu Klemente Russo da fikirlərini bildirib: “Daha öncə 2 dəfə qalib gəldiyim Teymur Məmmədov çəkisini dəyişdiyindən onunla 3-cü dəfə üz-üzə gəlməyimiz mümkün olmadı. Demək olar ki, peşəkar boksla da məşğul oluram. Bu məqsədlə APB ilə müqavilə bağlamışam və orda da döyüşəcəm”. Əbdülqədir Abdullayev: “Russo çox güclü rəqibdi. Baş məşqçimizlə birgə Klementenin keçirdiyi bəzi döyüşləri izləyib, onu təhlil etmişik. Güclü və zəif tərəflərini bilirik. Onun adından və titullarından çəkinmirəm. Kimin daha güclü olduğunu rinq göstərəcək”. Komandaların heyətləri: Baku Fires – İtalia Thunder 49 kq. Xamza Nametov – Mark Barriqa 56 kq. Məhəmməd Qurbanov – Xedafi Djelkhir 64 kq. Heybətulla Hacəliyev –Renato de Donato 75kq. Xaybulla Musalov - Boqdan Juratoni 91 kq. Abdulqadir Abdullayev – Klemente Russo

Xəbər 1216 dəfə oxundu.