“Abşeron” tribunasının “B” sektorunun biletləri tamamilə satılıb. Bu, “Filarmoniya” tribunasından sonra biletlərin hamısının satıldığı sayca ikinci tribunadır.
Paytaxtda aprelin 28-dən 30-dək keçiriləcək 2023 Formula 1 Azərbaycan Qran Prisi tribunalarından olan “Abşeron” tribunasının “B” sektorunun bütün biletləri satılıb.
Bakı Şəhər Halqası Əməliyyat Şirkətindən (BŞH) verilən məlumata əsasən, ölkəmizdə yeddinci dəfə keçiriləcək Formula 1 yarışı həm yerli, həm də xarici vətəndaşların marağını cəlb edir.
BŞH-nın Satış və Kommersiya departamentinin rəhbəri Səbri Gülmalıyev son zamanlar biletlərin satışında müşahidə olunan ciddi artımı tamaşaçıların Bakı yarışına göstərdiyi böyük maraq ilə əlaqələndirib: “Bu il yarışa beynəlxalq səviyyədə daha böyük maraq müşahidə edirik.
Yarışı izləmək istəyən xarici azarkeşlərin sayında ən yüksək artım da bu ilə təsadüf edir. Məhz buna görə də hazırkı mərhələdə satış göstəriciləri ötən illərlə müqayisədə artıq rekord həddə çatıb. Şübhəsiz ki, bunda Bakı Şəhər Halqasının ən sürətli şəhər yarışlarından biri olması ilə yanaşı ilk dəfə Sprint yarışına ev sahibliyi etməyimizin də rolu var. Əminik ki, Bakı bu il də ənənəyə sadiq qalaraq avtoidman həvəskarlarının ən çox sevdiyi yarış məkanına çevriləcək. Bütün azarkeşləri hələ də fürsət var ikən ilin ən baxımlı yarışına bilet əldə etməyə çağırıram”.
“Abşeron” tribunası Bakı trekinin ən böyük tribunasıdır və azarkeşlərin sevimli tribunalarındandır. Əldə olunan son məlumata görə, builki Azərbaycan Qran Prisinə ümumilikdə 100-ə yaxın ölkədən bilet alınır. Bu ölkələrin arasında Azərbaycanla yanaşı, Böyük Britaniya, Birləşmiş Ərəb Əmirlikləri (BƏƏ), Niderland, Avstriya, Almaniya, İrlandiya, İtaliya, İsrail, Argentina, Hindistan, Amerika Birləşmiş Ştatları, Meksika kimi ölkələr üstünlük təşkil edir.
Bilet alışına görə isə ilk üçlükdə isə Böyük Britaniya, Azərbaycan və Niderland qərarlaşıb.
Qeyd edək ki, bu il Formula 1 Azərbaycan Qran Prisi ilk dəfə olaraq doğma Bakımızda sürətsevərləri Sprint yarışı ilə salamlayacaq. Bənzərsiz yarış həyəcanını yaşamaq istəyənlər biletləri Bakı Şəhər Halqası Əməliyyat Şirkətinin (BŞH) rəsmi veb-səhifəsindən (www.bakucitycircuit.com) və ya şəhərimizin satış nöqtələrindən - 28 Mall”, “Gənclik Mall”, Heydər Əliyev Sarayı, Kiosk 1 (Azərbaycan kinoteatrı), Kiosk 2 (Nizami küçəsi), ASAN 1, ASAN 2, ASAN 3, ASAN 4, ASAN Sumqayıtdan əldə edə bilərlər.
|
