BATI YAR | batyyar@mail.ru
Köhnə-təzə çempion və Avrokubokun daha bir ilk iştirakçısı
Azərbaycanda mart atında dayandırılmış milli futbol çempionatının başlanması ilə bağlı sevincli günlərin ömrü 17 gün oldu.
May ayının 31-də "COVID-19" pandemiyası ilə əlaqədar tətbiq edilmiş xüsusi karantin rejiminin növbəti yumşalma mərhələsi idman məşqləri və yarışlarının keçirilməsinə də münbit şərait yaratmışdı. Fürsətdən istifadə edən AFFA-nın müvafiq slahiyyətli orqanları mövsümün başlanması ilə bağlı dərhal müvafiq qərarlar verdi.
Mövsüm bərpa olunur
Mayın 31-də klublar komitəsi müzakirələrdən sonra yarışların aqibəti ilə bağlı müvafiq razılığını və tövsiyələrini verdi. Ertəsi gün İcraiyyə Komitəsi pandemiya dövründə oyunların keçirilməsi ilə bağlı bir sıra təşkilati çətinlikləri nəzərə alaraq, birinci divizionda və Gənclər liqasında yarışları dayandırdı və yekunların mövcud turnir cədvəlləri əsasında elan edilməsi qərarını çıxardı.
Premyer liqa və ölkə kuboku uğrunda yarışların isə 5 əvəzetmə və matçlardan 48 saat əvvəl "COVID-19" testinin keçirilməsi ilə bərpası qərara alındı. Bununla əlaqədar PFL əsasnaməsində koronavirusla bağlı müvafiq yenilikləri, eləcə də Nazirlər Kabineti yanında Operativ Qərargahın qərar və tövsiyələrinə uyğun dəyişiklikləri edərək yenidən dərc etdi və təqvim hazırlandı.
Mövsüm bərpa olunmadı
Əfsuslar olsun ki, ölkədə pandemiya dalğasının yeni mərhələsi sərtləşdirmə tədbirlərini gündəliyə gətirdi və naməlum vəziyyət futbol mövsümünün meydanlarda tamamlanmadan başa şatdırılmasından başqa çarə qoymadı.
Nəhayət, iyunun 18-də bundan əvvəl Birinci divizionla bağlı verilmiş qərarın təkrarı elan edildi. Qəbul edilmiş qərara görə, klubların turnir cədvəlindəki mövqelərinə uyğun yekunlar elan edilir (11 səs lehinə, 1 səs əleyhinə), yarışı tərk edən olmur, yeni mövsüm yarışları, eləcə də milli komandaların təlim-məşq toplanışları üçün təqvim planının hazırlanması üçün işçi qrup yaradılır, cərimələrin tətbiqi ləğv olunur. Komandaların yeni mövsümə Operativ Qərargahın qəbul etdiyi müvafiq qərarlara və tövsiyələrə riayət etməklə hazırlaşmasına icazə verilir.
Yekun necə oldu
PFl İcraiyyə Komitəsinin qərarlarından sonra yekunları açıqladı. Beləliklə, "Qarabağ", ardıcıl 7-ci dəfə olmaqla, 8-ci çempionluğunu qeyd edir və ölkəmizi UEFA Çempionlar liqasında təmsil edəcək və ev oyunlarını Tofiq Bəhramov adına Respublika stadionunda keçirəcək. Bununla kollektiv, həm də "Neftçi"nin tarixi nailiyyətini də təkrarlamış oldu. Bu, həm də kollektivin 14-cü fəxri kürsüsüdür. Bu cəhətdən komanda yalnız "Neftçi"dən geri qalır.
Ağdam klubunun baş məşqçisi Qurban Qurbanov üçün bu nəticələr əlamətdar tarixdir. Çünki o, bununla 7-ci çempionluğunu yaşayır və cəmi 11-ci dəfə mükafatçı olaraq, özünə məxsus rekordu bir qədər də möhkəmləndirir. Komandanın mükafatları iyunun 20-də təqdim edilib.
18-ci dəfə medallara sahib çıxan "Neftçi" isə dalbadal ikinci ildir gümüş mükafatçı olur. Klubun "sükançı"sı Füzuli Məmmədov üçün bu, ilk belə mükafatdır və bunnunla o, medalçı olan 38-ci məşqçi kimi də tarixdə yer aldı.
"Keşlə" ikiillik həsrətə son qoyaraq, medalçılar sırasına düşür. Maraqlıdır ki, kollektiv cəmi bir il əvvəl liqanı tərk etməyə namizəd idi. Yalnız aşağı dəstədən lisenziyalaşdırma tələblərinə əməl edən tapıılmadığı üçün yerini qorumuşdu. Klubun yüksəlişinə nail olan baş məşqçi Tərlan Əhmədov iki il öncə "Neftçi"ni də bataqlıqdan çıxararaq eyni uğuru təkrarlamışdı.
PFL-in məlumatına əsasən, 1992-ci ildə ilk dəfə keçirilmiş milli çempionatın elitasında bu vaxta qədər 17 klub mükafatçılar sırasında yer alıb.
"Neftçi" və "Keşlə" ilə yanaşı, ölkəmizi avrokuboklarda 4-cü yerin sahibi "Sumqayıt" təmsil edəcək. Hər üç kollektiv UEFA Avropa liqasında qrupa düşmək üçün səy göstərəcək. Yeri gəlmişkən, bu, sumqayıtlıların tarixində ilk Avrokubok sevdası olacaq. Hər 3 klub çempionatda ev oyunlarını keçirdiyi stadionlarda avropalı rəqibləri qəbul edəcəklər.
Premyerliqada ən məhsuldar oyunçu siyahısında isə dördtirəlik yaranıb. Hərəyə 7 qol vurmuş "Sumqayıt"dan Peyman Babayi və "Qarabağ"lı Mahir Emreli, "Neftçi"dən Stiven Monroz və Baqali Dabo bombardir kimi mükafatlandırılacaqlar. Birinci divizionda isə Musa Qurbanlı ("Qarabağ-2") 15 qolla bombardir olub.
Yeni mövsümə və Avropkuboklara nə ilə
Yeni mövsümü avqustun 16-sı başlamaq planlaşdırılır. Amma hər şey pandemiya ilə bağlı vəziyyətdən asılı olacaq. Yeri gəlmişkən, AFFA-nın lisenziya komissiyası yeni mövsümdə UEFA klub turnirlərində və ölkə Premyer liqasında iştirak etmək üçün klubların müraciətinə də baxıb. Avropa klub kuboku yarışlarında "Qarabağ", "Qəbələ", "Neftçi", "Sumqayıt", "Zirə", "Səbail, "Keşlə" və "Sabah" iştirak edə bilər. Premyer Liqa yarışlarında iştirak etmək üçün müraciət etmiş "Kəpəz", "Ağsu", "Turan Tovuz", "Qaradağ-Lökbatan" və "Zaqatala" klublarına lisenziya verilməyib. Beləcə, gələn növsüm də milli klub futbolunda elitanın tərkibi dəyişməyəcək.
Komandaların yeni mövsümə hazırlığını da artıq başlamış saymaq olar. Çümpion Maqaye Geye ilə yollarını ayırıb və ilk transerini reallaşdırıb. Bu, Portuqaliya "Deportivu Şaviş"indən 27 yaşlı kolumbiyalı mərkəz müdafiəçisi Kevin Medinadır. Klubu braziliyalı qapıçı Vaqner da Silva, onun həmvətəni Aylton Silva və mərakeşli müdafiəçi Feysəl Rerras da tərk edir.
"Neftçi" də bəzi qərarlarını açıqlayıb. Klubun ilk transferi "Keşlə"dən Cabir Əmirli oldu və 23 yaşlı müdafiəçi ilə 2-illik müqavilə bağlanıb. Komandanı Vild-Donald Geryedən sonra yarımmüdafiəçilər Vangelis Platellas və Soni Mustivar, eləcə də müdafiəçi Tural Axundov tərk ediblər. Baqali Dabonun sosial şəbəkədəki yol verdiyi yanlışlıq klubun imicinə xələl gətirdiyi üçün futbolçuya maliyyə sanksiyası tətbiq edilib və o, komandanın gələcək oyun planlarına daxil olmadığından müqaviləsi bitdiyi 30 iyun tarixinə qədər fərdi məşqlərlə kifayətlənəcək.
Əmirlini "Neftçi"yə təslim etmiş "Keşlə" yarımmüdafiəçi Ruslan Qurbanovla müqaviləni qarşılıqlı razılıq əsasında yeniləməyib. Komanda iyulun əvvəlindən toplanışlara başlamaq niyyətindədir.
Yeri gəlmişkən, "Sabah" digərlərinə nəzərən daha fəaldır. "Qəbələ"dən Amin Seydiyev, Samir Məhərrəmli və İdris İnqilablını heyətinə cəlb etmiş klub yarımmüdafiəçi Vadim Abdullayev və müdafiəçi Kərim Diniyevlə vidalaşıb, hücumçu Xulio Rodrigeslə müqaviləni yeniləyib.
Hələlik, klublar özləri də kornavirus bəlası ilə bağlı suların nə vaxt durulacağını bilmədiklərindən hazırlıq planlarını da tam açıqlaya bilmirlər.
UEFA-nın qərarları
Avropa futbolunun başbilənləri ümumi vəziyyəti müzakirə edərək, qitə klub kuboku yarışlarını "Səkkizlər finalı" formatında Lissabonda başa vurmaq qərarına gəliblər. 1/8 finalın "Yuventus" - "Olimpik"Lion, "Barselona" - "Napoli", "Mançester Siti" - "Real"Madrid və "Bavariya" - "Çelsi" görüşləri avqustun 7-8-də keçiriləcəklər ("Atalanta", "Atletiko"Madrid, PSJ və "Leypsiq" 1/4 finaldadırlar). Lakin yerlə bağlı qərar açıqlanmayıb (Mümkün variant - Portudakı "Estadiu du Draqau" və Gimaraeşdəki "Estadiu Dom Afonsu Henrikeş"). "Səkkizlər finalı"nın 1/4 finalı - 12-15 avqust, 1/2 finalı - 18-19 avqust, finalı isə 23 avqusta planlaşdırılıb. Oyunlar "Eştadiu da Luş" və "Joze Avalade" stansionlarında olacaq. Bu səbəbdən İstanbul gələnilki, Sankt-Peterburq isə 2022-ci ilin finallarının ev sahibləri olacaqlar.
Avropa liqası eyni qayda ilə Almaniyada - Köln, Duysburq, Düsseldorf və Gelzenkirxendə 10-21 avqustda başa çatdırılacaq. 1/8 final oyunları avqustun 5-6-da keçiriləcək. Sonra 1/4 final 10-11 avqustda, yarımfinal - 16-17 avqustda, final 21 avqustda (Köln) olacaq.
İyulun 10-da püşkatmalar keçiriləcək.
Qdansk Avroliqanın finalını gələn il qəbul edəcək və bu qayda ilə digər finalların məkanları (Sevilya, Budapeşt) bir il sonrakı yarışa yekun vuracaqlar.
Bizi maraqlandıran isə gələn ilin təqvimidir. UEFA hər iki yarışın formatını təsdiqləyib. Çempionlar liqasında, pley-off raundu istisna olmaqla, digər təsnifat yarışları bir oyundan ibarət olacaq. Avropa liqasında isə qrupa qədər hər mərhələ bir oyundan ibarət keçiriləcək. Ev sahiblərini püşk müəyyən edəcək.
Təqvimə də nəzər salaq
Çempionlar liqası: ilkin təsnifat - 8 və 11 avqust, 1-ci təsnifat - 18/19 avqust, 2-ci təsnifat - 25/26 avqust, 3-cü təsnifat - 15/16 sentyabr, pley-off - 22/23 və 29/30 sentyabr.
Qrup mərhələsi: 20/21 və 27/28 oktyabr, 3/4 və 24/25 noyabr, 1/2 və 8/9 dekabr.
Avropa liqası: ilkin təsnifat - 20 avqust, 1-ci təsnifat - 27 avqust, 2-ci təsnifat - 17 sentyabr, 3-cü təsnifat - 24 sentyabr, pley-off - 1 oktyabr.
Qrup mərhələsi: 22 və 29 oktyabr, 5 və 26 noyabr, 3 və 10 dekabr.
Qrup mərhələsinin püşkü Afinada oktyabrın 1-2-də keçiriləcək.
Builki Superkubok oyunu sentyabrın 24-də Budapeştdə "Puşkaş Arena"da, növbəti illərdə isə Belfastda (2021), Helsinkidə (2022) və Kazanda (2023) keçiriləcək.
BATI YAR
|
