Hələlik iki idmançı
Artıq olimpiada ilə bağlı əksər detallar məlumdur. Oyunların təqvimi, yarışların reqlamenti, yarışın keçiriləcəyi məkanlar və s. ilə bağlı son qərarlar da verilib. Əvvəllər də qeyd etmişdik ki, yarışda 26 növdə 303 dəst medal uğrunda mübarizənin şahidi olacağıq. Təşkilat komitəsi təxminən 205 ölkədən 12500 idmançının Londonda yarış məkanına çıxacağını bildirir. Onlar arasında Azərbaycan idmançılarının da olacağı artıq dəqiqləşib. Rəsmi informasiyaya görə və təşkilat komitəsinin dərc etdiyi məlumatlarda qeyd olunur ki, Bakıda keçirilən olimpiya təsnifat yarışında iki taekvondoçumuz Londona vəsiqə əldə edib. Amma daha bir atletimizin və boksçumuzun da lisenziya qazanması yaxın vaxtlarda qəti təsdiqini tapa bilər. Ümumənsə, olimpiadaya komandamızın əvvəlki illərlə müqayisədə, daha geniş heyətlə qatılması gözlənilir. Bu mənada avarçəkənlərin də rolu ola bilər. Söz yox ki, həmişə olduğu kimi, bu dəfə də güləşçilərimiz, boksçularımız və cüdoçularımız ön planda olacaqlar. Pəhləvanlarımızın oyunlarda bütün çəkilərdə təmsil olunması da reallıqdır. Bu ilin sonuna qədər əksər idman növlərində olimpiya iştirakçılarımızın adlarını öyrənəcəyik. Bu mənada, Bakıda keçiriləcək daha bir yarışı - boksçuların dünya çempionatını isə canlı olaraq izləmək imkanımız da olacaq.
8 min dəliklik 3-halqalı məşəl
Yarışa hazırlığa gəlincə, birilliyin təntənələrində təşkilat komitəsinin sədri Lord Sebastyan Kou deyib ki, hər şey qrafik üzrə gedir və ən əsası, onlar müəyyən olunmuş büdcədən kənara çıxmırlar. Artıq olimpiya məşəli estafetinin də detalları məlumdur. Qızıl suyuna çəkilmiş və alüminiumdan hazırlanacaq məşəl üz tərəfdən 8 min dəliyi olan 3 dəyirmi halqadan ibarət piramidadır. 3 halqa Londonun olimpiadanı 3-cü dəfə qəbul etməsinin rəmzi kimi düşünülüb. Dəliklərin sayı isə qət ediləcək məsafə və insanların sayına işarədir. 8 min məşəl Koventri qraflığında hazırlanıb və hava şəraiti, külək və yağışa davamlılığı Almaniyanın Münhen şəhərində BMW konsernində sınaqdan çıxarılacaq. Məşəl Britaniyaya gələn il mayın 18-də çatdırılacaq və iyunun 27-dək ölkənin 74 yaşayış məskənində gəzdiriləcək.
- 8 min iştirakçı alovu 8 min mil məsafədən keçirərək, 70 gün ərzində Londona çatdıracaq. Hazırda əsas diqqət infrastrukturun və xidmət səviyyəsinin təftişinə yönəldilib.
Test, test və bir daha test - hər şey dəqiq olmalıdır, - deyə Kou onu da əlavə edib ki, onlar bundan əvvəl keçirilmiş Pekin-2008-lə rəqabətdə deyillər və heç bir vəchlə ondan da yaxşı Oyunlar keçirmək məqsədini qarşıya qoymayıblar. Çünki olimpiada üçün ən vacibi onun bir ölkədən digərinə, bir mədəniyyətdən digərinə ötürülməsidir və bu məsələdə hər bir ölkə ən yaxşı cəhətləri təqdim edir.
İrsiyyət və ənənə
- London Oyunları Pekin olimpiadasından nə yaxşı olacaq, nə də pis. Bu, tam fərqli olimpiada olacaq, - deyərək o, qeyd edib ki, London Oyunlarında ən xırda detallara qədər hər bir məsələyə ciddi fikir verəcəklər.
Ser Kounun sözlərinə görə, onlar Londonda keçirilmiş əvvəlki iki olimpiadının irsinə arxalanır və məsuliyyətini tam dərk edirlər.
- Əvvəlki London oyunlarının hər biri olimpiya hərəkatında yeni söz deyib. 1908-ci ildə idmançılar ilk dəfə böyük stadionda yarışmışdılar və ilk dəfə hər bir idmançı, konkret olaraq, öz ölkəsinin şərəfini qorumağa başlamışdı. 1948-ci ildə könüllülər dəstəsi peyda oldu və bu gün olimpiadanı onlarsız təsəvvür etmək belə mümkün deyil. Elə o vaxtdan daimi və müvəqqəti idman obyektlərinin konsepsiyasının ənənəsi qoyuldu - deyən Kou olimpiadadan sonra obyektlərin istifadəsiz qalmasından da narahat deyil. - Barselonanı misal çəkə bilərəm. 1992-ci ildə inşa olunmuş obyektlərdə bu gün də idman yarışları keçirilir. Deyim ki, Londonda inşa olunan "Akvatik mərkəz" olimpiada dövründə 17 min tamaşaçı tutacaq. Amma sonra tutum 2,5 min nəfərə qədər dəyişdiriləcək və burada Britaniya və hətta Avropa çempionatlarını tam sərbəst keçirmək olacaq. İnşaat işlərində bu incəliklər nəzərə alınıb.
Kou əmindir ki, olimpiada Londonu tarixə yaradıcılıq vüsəti, dinamik inkişaf edən meqapolis, tolerant şəhər kimi salacaq.
Olimpiya tarixinin ən ağır medalı
Hər bir idmançı üçün Londonda qalib gəlməyin yaddaqalan daha bir tarixçəsi olacaq. Axı, burada idmançılara olimpiya tarixinin ən iri medalları veriləcək. Medallar ictimaiyyətə "Oyunlara bir il qaldı" təntənələrinin məşhur Trafalqar meydanında cərəyan edən şənliyində təqdim olunub. Beynəlxalq Olimpiya Komitəsinin prezidenti Jak Roqqun da qatıldığı mərasimdə onu Britaniya şahzadəsi Anna nümayiş etdirib. Mükafatın tərtibatçısı məşhur rəssam Deyvid Uotkinsdir. Qalib və mükafatçıların qənimətinin diametri 8,5 sm, qalınlığı 7 mm, çəkisi 400 qramdır. Onun üz tərəfində, ənənəyə uyğun olaraq, qədim yunan əsatirlərinin qələbə ilahəsi Nika və arxa fonda Oyunları qəbul edən Panteon məbədi təsvir olunub. Əks tərəfdə isə 5 rəmz var. Bu rəmzlər sırasında Temza çayını qeyd etmək lazımdır. Onun fonunda isə oyunların loqotipi qiymətli daş cizgiləri ilə verilib. 2100 medalın hamısı Cənubi Uelsdə Llantrizant şəhərindəki "Royal Mint" müəssisəsində hazırlanacaq.
Açılışda Makkartni ifası
Əfsanəvi müğənni Ser Pol Makkartni oyunların açılış mərasimində öz ifasından nümunələr səsləndirməyə razılıq verib. 69 yaşlı müğənni artıq indidən mahnıların mətni və şounun konsepsiyasına uyğun musiqi mətnləri üzərində işə başlayıb. Təşkilatçılar burada bütün Britaniya musiqi əfsanələrini toplamaq istəyirdilər. Lakin "Rollinq Stounz", "Led Zeppelin" kimi klassik rok qrupları, həmçinin "Bitlz"ın daha bir üzvü Rinqo Star mərasimə qatılmaqdan imtina ediblər.
Birilliyin nailiyyətləri
Yarışlara bir il qalmış təşkilat komitəsi uğurlarının bir qismi haqqında məlumat dərc edib.
* Artıq birinci mərhələdə satışa çıxarılmış 3,5 milyon bilet sahiblərinə qovuşub.
* Olimpiyaçıların qulluğunda dayanacaq 250 min könüllü iş başına keçməsini gözləyir. Onlardan 70 mini artıq müvafiq təlimatı da alıb.
* Oyunlarla bağlı bütün dünyada keçirilən tədbirlərdə 12 milyondan artıq uşaq iştirak edib.
* Oyunlarda müxtəlif mükafat və hədiyyələr üçün 700 milyon funt sterlinq xərclənəcək və artıq 900 mindən artıq məhsul hazırdır.
Olimpiya parkında son işlər gedir
Təşkilat komitəsi əsas yarışların məskəni olacaq Olimpiya parkında işlərin 88 faizinin başa çatdırıldığı barədə məlumat yayıb. Eyni zamanda nəqliyyat infrastrukturu artıq indidən kifayət qədər yaxşılaşmış sayıla bilər. Su yolları da tam təmizlənərək ideal vəziyyətə gətirilib. Bütün nəqliyyat işləri üçün ayrılmış 6 milyard funtluq işlərin 98 faizi artıq görülüb.
Tezliklə 17 minlik Hokkey mərkəzində, eləcə də Olimpiya parkından kənarda olan Atçılıq mərkəzində və Qrinviç Parkda da işlər yekunlaşacaq. Başa çatdırılan tikinti layihələri sırasında Su idmanı mərkəzi də var. Burada da 17 min tamaşaçı üçün yer var. Artıq arena suya tullananların iştirakı ilə sınaqdan da çıxarılıb. Qeyd edək ki, bu, Olimpiya parkının istismara verilən 6-cı obyektidir. Buna qədər Olimpiya stadionu, həndbol və basketbol arenaları, velodrom və Beynəlxalq teleyayım mərkəzinin inşası yekunlaşmışdı.
"Örlz Kort" da istifadəyə hazırdır. O, tarixi bina sayılır. Çünki burada 1948-ci il olimpiadasının boks, ağırlıqqaldırma, güləş və gimnastika yarışları keçirilmişdi. İndi onun 15 oyun qəbul edəcək voleybol meydançası sınaq üçün hazırdır. Burada bir neçə komandanın iştirakı ilə turnir planlaşdırılıb.
BATI YAR
|
