İsveçdə səmti müəyyən etmədən seminar

30 yanvar–3 fevralda İsveçin Qotenburq şəhərində səmti müəyən etmə üzrə 6-cı Yüksək Dərəcəli Tədbirlər Seminarı keçiriləcək.

İdman.com.az saytı xəbər verir ki, ev sahibi və IOF-in birgə təşkil edəcəyi tədbirə Azərbaycan Səmti Müəyyən Etmə Federasiyasının Şurasının üzvləri, eləcə də Finlandiya, İtaliya, Norveç, Polşa, Avstriya, Litva, Serbiya və digər ölkələrdən 60-a yaxın iştirakçı qatılacaqlar.

Toplantı 3 mövzuya həsr ediləcəkdir: 1. Səmti Müəyyən Etmə üzrə dünya çempionatının (WOC) təşkili; 2. Səmti Müəyyən Etmə veteranları arasında dünya çempionatının (WMOC); 3. Tədbirin proqram təminatı (elektron qeydolunma sistemi).

Mirəli Kazımov: Avropa artıq bizdən nümunə götürür

“Səmti müəyyən etmə idmanında işimizin səviyyəsini daha artıracağıq”

Səmti müəyyən etmə idmanının cari mövsümü qənaətbəxş başa vurduğunu söyləmək olar. İdman.com.az xəbər verir ki, federasiya il ərzində bir neçə yarış keçirib. Bunlar arasında həm ölkə daxili, həm də beynəlxalq tədbirlər olub. Sözügedən rəqabətdə iştirakçı sayında da artım müşayiət edilib. Əgər son 2 ilədək respublika turnirlərinə 20 səmti müəyyən edən qatılırdısa, federasiyanın rəhbərliyində baş verən dəyişiklikdən sonra, zaman-zaman idmançı sayı artıb (20+130+200+320).

Ən yaxşı göstərici may ayında qeyd olunub. Ümummilli lider Heydər Əliyevin 90 illik yubileyinə həsr olunmuş 1-ci beynəlxalq açıq kubok mübarizəsində 320 nəfər iştirak edib.

İyulda təmsilçilərimiz Finlandiyada dünya çempionatında mübarizə aparıblar. Bu tədbir əlamətdarlığı ilə yadda qalıb. Belə ki, yarışın gedişində “Azərbaycan gecəsi” adlı tədbir təşkil olunub. Həmin yığıncaqa İOF-un prezidenti Brian Porteos və vitse-prezidenti Astrid Valer Kaas ilə yanaşı, digər ali qonaqlar dəvət olunublar. Toplantıda ölkəmizin təbiəti, mətbəxi, insanların qonaqpərvərliyi haqqında məlumat verilib. Skandinaviya səfəri “İdman Azərbaycan” telekanalı vasitəsilə yerində işıqlandırılıb.

Mədəniyyət və Turizm Nazirliyi tərəfindən Azərbaycan tarixi, mətbəxi, təbiəti haqqında 120 ədəd kitab, ölkəmiz barədə 100 ədəd xüsusi disk, eləcə də, Azərbaycanı və Bakını özündə əks etdirən rəsmlər, suvenirlər, milli xalçalar və tar-kaman bütün qonaqlara hədiyyə olunub.

Yığıncağın sonunda İOF prezidentinin xüsusi nümayəndəsi Tatyana Qələndəroğlu çıxış edərək, qısa müddətdə qazanılan nailiyyətə görə, SMEF-in prezidenti Mirəli Kazımova təşəkkürünü bildirib. Qeyd edib ki, ölkəmiz bu sahədə fəallardandır və səmti müəəyən etmə idman növünün təbliğinə, işıqlandırılmasına xüsusi yer verir; digər ölkələr Azərbaycandan nümunə götürməli, təcrübəsindən yararlanmalıdırlar.

Cari mövsümdə Avropa İşçi Qrupunun nümayəndələri ölkəmizdə monitorinq aparıb, buradakı şəraitidən razı qaldıqlarını deyiblər. Mirəli Kazımov saytımıza müsahibəsində bildirib ki, yerli federasiya gələn il işin səviyyəsini və keyfiyyətəni daha artıqmağı qarşıya məqsəd qoyub:

“Gələn il yarışlarımızın sayı artacaq. Binəqədi rayonunda yerləşən məktəblərdə səmti müəyyən etmənin tətbiqi məsələsində icra başçısı ilə şifahi razılığa gəlmişik. Universitetlər və güc strukturları arasında turnirlər də nəzərdə tutulub.

Beynəlxalq tədbirlərə gəlincə, fevralda Antalyada dünya kubokunda mübarizə aparacağıq. May ayında Heydər Əliyevin 90 illik yubileyinə ənənəvi yarış keçiriləcək. İyulda İtaliyada təşkil olunacaq dünya çempionatına biz də dəvətliyik.

İdman sahəsində böyük təcrübəsi olan vergilər naziri Fazil Məmmədovun tövsiyəsindən, Gənclər və İdman Nazirliyinin dəstəyi və Ukraynanın Azərbaycandakı səfiri, yaxın dostumuz Aleksandr Mişenkonun təcrübəsindən yararlanıb, işimizi daha yaxşı təşkil etmək niyyətindəyik”.

SMEF-in prezidenti onu da əlavə edib ki, yaxın gələcəkdə klubların sayını çoxaltmaq, rəqabətdə gərginliyi və səviyyəni artırmaq üçün, legionerləri dəvət edilməsi nəzərdə tutulub:

““Nefiçi” İdman-Sağlamlıq Mərkəzi, Aviasiya Akademiyası, “Avropa” liseyi və Slavyan Universitetində bölməmiz fəaliyyət göstərir. Krımın məşhur “Artek” düşərgəsi ilə qarşılıqlı təcrübə müdalisi də planlaşdırırıq. Bir də, yaxın gələcəkdə klublarımıza əcnəbi mütəxəssisləri dəvət etmək fikrimiz var”.

Səmti müəyyən etmə üzrə Türkdilli Dövlətlərinin Çempionatı keçiriləcək?

Türkiyənin mədəni paytaxtında səmti müəyyən edənlər arasında “Istanbul 5 days” beynəlxalq yarışı keçirilib. İdman.com.az xəbər verir ki, turnir İstanbulun tanınmış məkanları - Çeşməsi (Belgrad Forest), Büyükada (“The Prince”s İslands), Ulduz Park (Beşikdaş), Ciftalan (Qurdkəməri) və “Grand Bazaar”da təşkil olunub.

Bu rəqabətdə yerlilərlə yanaşı, Finlandiya, İsveç, Norveç, İtaliya, Danimarka, Avstriya, Almaniya, Estoniya, Rusiya, Ukrayna, Qazaxıstan klublarından olan idmançılar qatılıblar. Turnirin proqramına uzun və orta məsafələr, eləcə də sprint və super sprint yarışlar daxil idi.

Ölkəmizi bu sınaqda Səmti Müəyyən Etmə Federasiyasının prezidenti Mirəli Kazımov təmsil edib. O, sprintçilərin mübarizəsində qüvvəsini sınayıb. Sonra qaliblərinin mükafatlandırma mərasiminə fəxri qonaq qismində iştirak edib.

Yarış çərçivəsində Türkiyə səmti müəyyən etmə idman klublarının prezidentləri və ayrıca olaraq Türkiyə SMEİF-in Prezidenti T.Çolaqoğlu ilə Türkdilli Dövlətlərinin Çempionatının birgə keçirilməsi haqqında danışıqlar aparılıb.

Səmti müəyyən edənlər Filippovun xatirəsini yad etdilər

Nabranın "Xəzər" turist bazasında Vyaçeslav Filippovun xatirəsinə səmti müəyyən etmə üzrə kubok mübarizəsi başa çatıb. Idman.com.az xəbər verir ki, yarışdan bir gün öncə, noyabrın 2-də idman turizmi üzrə SSRİ idman ustasıının xatirə gecəsi kesirilib. Həmin tədbirdə çıxış edən federasiyanın vitse-prezidenti Nizami Mursakulov turnirin səbəbkarının həyatı və idman sahəsində əldə etdiyi uğurlardan danışıb.

Sonra SSRİ idman ustası haqqında geniş videoçarx nümayiş etdirilib. Bu, idmançılar tərəfindən böyük maraqla qarşılanıb. Daha sonra təcrübəli mütəxəssisin həyat yoldaşı Yelena Filippova və eləcə də dostları Aleksandr Nəcəfov, Yaqub Əsədov, Tahir Süleymanov, Tərlan Ramazanov söz alaraq, idman ustası haqqında maraqlı söhbətlər etmiş, onunla bağlı təssüratlarını gənclərlə bölüşüblər.

Kubok mübarizəsinə gəlincə, təxminən 70 nəfərə yaxın idmançının qatıldığı yarış "K-21”, "Q-21” və "Junior” qrupları üzrə keçirilib. 2.5 saat nəzarət vaxtı təyin edilmiş yarışda kişilər üçün 4.6 km (13 NM), qadınlar üçün isə 4.0 km məsafə (11 NM) müəyyən edilmişdir. "Junior” qrupu üzrə mübarizə aparan idmançılar isə 0.8 km məsafədə 7 nəzarət məntəqəsini müəyyən etməli idilər.

Gərgin keçən rəqabətdə "K-21” qrupu üzrə Sergey Telegin qalib olub. Ondan 2 dəqiqə geri qalan Emin Məmmədov 2-ci, Müvəssil Allahverdiyev 3-cü yeri tutub. "Q-21” qrupu üzrə Nataliya Əliyeva qızıl medal qazanıb. Yanina Maşkova 2-ci, Çokuet Karolin isə finişə 3-cü çatıb.

"Junior” qrupunda Cavid Hüseynzadə nöqtəyə hamıdan birinci çatıb. 2-ci və 3-cü yerləri isə müvafiq olaraq Mariya Mişenko və Mariya Fedyukina tutublar. Fərqlənən idmançılara federasiyanın vitse-prezidenti Nizami Mursakulov və federasiyanın fəxri üzvü Aleksandr Mişenko tərəfindən medal və xatirə diplomu təqdim edilib.

Səmti ən yaxşı müəyyən edənlər kimlərdir?

Bakı şəhərinin Binəqədi rayonunda (Avtovağzal yaxınlığında yerləşən meşə massivində) səmti müəyyən etmə idman növü üzrə növbəti çempionatı keçirilmişdir. İdman.com.az saytı xəbər verir ki, yarış Vergilər Nazirliyi və Bakı Binəqədi rayon İcra Hakimiyyətinin dəstəyi ilə, Gənclər və İdman Nazirliyi və Səmti Müəyyən Etmə İdman Federasiyası tərəfindən təşkil olunub.

Yarış açıq keçirilməklə, nəticələr komanda və fərdi olaraq hesablanıb. Əvvəlki illərdə Nabranda (Yalamada) düzənlik ərazilərdə keçirilmiş çempionatlardan fərqli olaraq, bu Respublika Çempionatı təpəli, bəzi yerlərdə dik yoxuşlu, sıldırımli, yarğanlı, çuxurlu və məsafəyə əlavə çətinlik verən digər relyef obyektli ərazidə leysan yağışın altında keçirilib.

Çempionat müvafiq xəritə, eləcə də ilk dəfə olaraq milli mütəxəssislər briqadası tərəfindən təmin olunmuş beynəlxalq elektron qeydolunma sisteminin tətbiqi ilə beynəlxalq standartlara tam uyğun şəkildə keçirilib. Yarış poliqonunun, yarışın təntənəli açılış/bağlanış mərasiminin lazımi avadanlıqla təmin olunmasına şərait yaratmış Binəqədi rayonu İcra Hakimiyyətinin rolu da xüsusilə qeyd edilməlidir. Çünki yarışın açılış mərasimindən öncə başlamış və yarışın sonuna qədər davam etmiş güclü yağış şəraitində keçirilmiş tədbirdə əvvəlcədən hazırlanmış çadırlar, isti çay və buterbrodlar tam yerinə düşmüşdür. Lakin, yağışın yağması, çətin keçilən palçıqlı məsafələr idmançıları kubok uğrunda mübarizə aparmağa əngəl olmayıb. Yarışda ümumilikdə, müxtəlif kateqoriyalar üzrə 188 nəfər idmançı iştirak etmişdir (müqayisə üçün: 2012-ci ildə keçirilmiş respublika çempionatında cəmi 130 nəfər iştirak etmişdi). 188 nəfər idmançıdan 79-u "K (kişi)-21-Elit", 41-i "Q (qadın)-21-Elit", 50 nəfəri kişi/qadın OPEN kateqoriyasının idmançısı və 28 nəfəri JUNIOR üzrə qaçan uşaqlar olmuşdur.

Bundan əlavə, yarışda hazırda Bakı şəhərində yaşayan Finlandiya, Yeni Zellandiya və Hollandiyadan olan xaricilər də iştirak etmişlər. Ümumilikdə, kubok uğrunda Azərbaycanın müxtəlif nazirlik, idarə, təşkilat, təhsil müəssisələrini təmsil edən 15 komanda (komandanın tərkibinə 4 kişi və 2 qadın daxil idi), eləcə də Ukraynanın Azərbaycan Respublilasındakı Səfirliyinin komandası da iştirak edib.

Komandaların əsas mübarizəsi K (kişi)/Q (qadın) - 21 "ELİT" kateqoriyasında olmuşdur. Kişilərin məsafəsi 20 nəzarət məntəqəsindən ibarət 4.1 km təşkil edib. Bununla belə, məsafənin hündürlük toplamı 220 metr müəyyən edilmişdir (bu isə təcrübədə hər iştirakçının 8-9 mərtəbəli bina hündürlüyündə 7 təpə aşması deməkdir). Qadınların məsafəsi 12 nəzarət məntəqəsindən ibarət, 120 metr hündürlük toplamlı 2.9 km təşkil etmişdir. OPEN kateqoriyasında məsafə 11 nəzarət məntəqəsindən ibarət olmaqla 2.2 km olub. Uşaqlar isə 1 km məsafə keçib 11 nəzarət məntəqəsində qeyd olunmalı idilər.

Gərgin mübarizə nəticəsində ümumi komanda birinciliyində yerlər aşağıdakı kimi bölünmüşdür:
1 yer - Ukraynanın Azərbaycan Respublikasındakı Səfirliyi;
2 yer - Xüsusi Dövlət Mühafizə Xidməti;
3 yer - Fövqəladə Hallar Nazirliyi.

Bütün komanda iştirakçıları Gənclər və İdman Nazrliyinin müvafiq dərəcəli diplomları ilə, eləcə də Binəqədi rayon İcra Hakimiyyətinin təqdim etdiyi qiymətli hədiyyələrlə təltif olunub. Bundan əlavə, Ukraynanın Azərbaycan Respublikasındakı Səfirliyi Respublika Çempionatının qalibi kimi fəxri kubokla mükafatlandırılıb.

Fərdi hesabda qalib gəlmiş idmançılar:

* "K (kişi) 21 ELİT" kateqoriyası:
1-ci yer - Aleksandr Mişenko (Ukraynanın Azərbaycandakı Səfiri)
2-ci yer - Şənlik Fətəliyev (AR DİN Daxili Qoşunlar)
3-cü yer - Orxan Şahbazov (Xüsusi Dövlət Mühafizə Xidməti)
* "Q (qadın) 21 ELİT" kateqoriyası:
1-ci yer - Natalya Əliyeva ("Neftçi" İSM )
2-ci yer - Nadejda Manuilova ("Dağçılıq" İdman Klubu)
3-cü yer - Yanina Maşkova ("Dağçılıq" İdman Klubu)

* "OPEN - kişi" kateqoriyası:
1- ci yer - Cavid Süleymanov
2-ci yer Hüseyn Hüseynov
3-cü yer - Seymur Davudov

* "OPEN - qadın" kateqoriyası:
1-ci yer - Tatyana Fedyukina (Ukrayna)
2-ci yer - Rövşanə Babayeva
3-cü yer - Yana Kazımova

Səmti müəyyən etmə üzrə açıq ölkə çempionatı keçiriləcək

Oktyabrın 27-də səmti müəyyən etmə idman növü üzrə növbəti açıq respublika çempionatı keçiriləcək. İdman.com.az saytı xəbər verir ki, yarışın açılışı Binəqədi rayonunun “Avtovağzal” adlanan ərazisində 10:30-da baş tutacaq.

Rəqabətə 11:30-da start veriləcək. Təxminən 150 nəfərədək idmançının qatılacağı gözlənilən çempionat, Binəqədi Rayon İcra Hakimiyyətinin təşkilati dəstəyi ilə keçiriləcəkdir.

Səmti müəyyən edənlər Pirquluya toplaşdılar

20-22 sentyabrda Fövqəladə Hallar Nazirliyinin səmti müəyyən etmə idman növü üzrə I qapalı çempionatı baş tutub. İdman.com.az saytı xəbər verir ki, Şamaxı rayonunun Pirqulu qəsəbəsində (Vergilər Nazirliyinin Tədris Mərkəzi) keçirilmiş yarışda 23 komanda və eləcə də şəxsi hesabda idmançılar qüvvələrini sınamışlar.

Səmti Müəyyən Etmə İdman Federasiyasının təşkilatçılığı ilə 2 gün davam etmiş tədbirdə, komanda hesabında Bakı Regional Mərkəzi fərqlənib. Gümüş və bürünc medalları isə müvafiq olaraq Muğan Regional Mərkəzinin və Dövlət Sularında Xilasetmə Xidmətinin kollektivləri qazandılar.

Sözü gedən çempionatını yüksək səviyyədə keçirdiyi üçün, Səmti Müəyyən Etmə İdman Federasiyası "Tədbir medalı” ilə təltif edilib. Medal FHN-nin İdman Sağlamlıq Klubunun rəisi, polkovnik Füzuli Musayev tərəfindən təqdim olunub.

Finlandiyada “Azərbaycan gecəsi”

Səmti Müəyyən Etmə İdman növü üzrə Finlandiyada keçirilmiş dünya çempionatının gedişatında Azərbaycan Respublikası Səmti Müəyyən Etmə İdman Federasiyasının prezidenti Mirəli Kazımovun təşkilatçılığı ilə “Azərbaycan gecəsi” təşkil olunub. İdman.com.az saytı xəbər verir ki, həmin tədbirə İOF-un prezidenti Brian Porteos və vitse-prezidenti Astrid Valer Kaas ilə yanaşı, dünya çempionatında iştirak edən bütün komandaların federasiya prezidentləri, vitse-prezidentləri, baş məşqçilər, çempionatda fərqlənən idmançılar və eləcə də bu idman növünün veteranları təşrif buyurublar. Təxminən 90 nəfərə qədər qonağın da iştirak etdiyi gecə Azərbaycan Respublikasının Dövlət Himninin səslənməsi ilə başlayıb.

Bundan sonra AR SMEİF-in prezidenti Mirəli Kazımov gecədə iştirak edən bütün qonaqları salamlayıb. Öz çıxışında federasiya prezidenti qonaqlara Azərbaycan haqqında eləcə də bu idman növünün ölkəmizdə inkişafı haqqında məlumat verib, bundan başqa ölkə başçısı, cənab İlham Əliyev tərəfindən Azərbaycanda bütün sahələrə olduğu kimi idmana da göstərdiyi diqqət və qayğını qonaqlarını diqqətinə çatdırıb. Federasiya prezidentinin çıxışından sonra Azərbaycanın mədəniyyəti, tarixi və təbiəti haqqında qısametrajlı film nümayiş etdirilib. Film bütün qonaqlar tərəfindən böyük alqışlarla qarşılanıb.

İOF rəsmiləri dövlət tərəfindən göstərilən böyük diqqət və dətək sayəsində bu idman növünün Azərbaycanda son iki il ərzində dinamika ilə inkişaf etdiyini xüsusi vurğulanıb, federasiyanın cavan olmasına baxmayaraq qısa müddət ərzində həyata keçirilmiş layihələr, turnirlər, səmti müəyyən etmənin xüsusi olaraq gənclər arasında yayılmasına istiqamətləndirilmiş tədbirləri, görülmüş işləri müsbət dəyərləndirib, digər ölkələrin federasiya nümayəndələrinə bir nümunə kimi tövsiyyə olunub. Bu fürsətdən istifadə edərək sonda İOF prezidenti hamını dost Azərbaycana dəvət etdi və öz nümayəndələri ilə birgə gələn il Azərbaycanda toplantı keçirilməsi barədə bildirib.

Çıxışdan sonra may ayında Azərbaycanda keçirilmiş Ümummilli lider Heydər Əliyevin 90 illik yubileyinə həsr olunmuş I Beynəlxalq Açıq Kubok yarışı haqqında videorolik nümayiş etdirilib. Bu videoçarxdan dərhal sonra, sözügedən kubok yarışında iştirak etmiş İOF prezidentinin xüsusi nümayəndəsi Tatayana Kalendaroğlu və eləcə də Rusiya SMEF-in nümayəndəsi Aleksandr Trempoltsev öz çıxışlarında Azərbaycanda təşkil olunmuş Azərbaycan xalqının Ümummilli lideri Heydər Əliyevin 90 illik yubileyinə həsr olunmuş I Beynəlxalq Açıq Kubok yarışının yüksək səviyyədə keçdiyini bildirməklə yanaşı Azərbaycanın təbiəti, mətbəxi, insanların qonaqpərvərliyi haqqında da qonaqlara məlumat veriblər.

Çıxışların sonunda AR SMEF-in prezidenti Mirəli Kazımov və İOF-un prezidenti Brian Porteos ilə birlikdə üzərində Azərbaycan bayrağı və “Welcome to Azerbaijan” yazılmış tortu kəsiblər. Bundan sonra milli musiqi altında qonaqlar ziyafətə dəvət olunub.

Tədbirin gedişində İtaliya, Fransa, Kanada, Almaniya, Estoniya, Rusiya və digər ölkələrin federasiya prezidentləri, Avropa İşçi Qrupunun üzvləri bu gecəyə görə öz təşəkkürlərini bildirməklə yanaşı belə bir səmimi, unudulmaz gecədə heç zaman olmadıqlarını qeyd ediblər. Rusiya Federasiyasının vitse-prezidenti eləcə də Avropa İşçi Qrupunun nümayəndəsi Aleksandr Kuzmin isə həmin yarışda Rusiya komandasının əldə etdiyi qızıl medalı Azərbaycan gecəsinə həsr etdiyini bildirib.

Sonda onu da qeyd edək ki, federasiyamız bu bu tədbirə böyük hazırlıq ilə qatılıb. Belə ki, Mədəniyyət və Turizm Nazirliyi tərəfindən Azərbaycan tarixi, mətbəxi, təbiəti haqqında 120 ədəd kitab, 100 ədəd Azərbaycan haqqında xüsusi disk, eləcə də, Azərbaycanı və Bakını özündə əks etdirən rəsmlər, suvenirlər, milli xalçalar, tar-kaman, Azərbaycan şərabları və konyaklar bütün qonaqlara hədiyyə olunub.

Məlumatların sayı: 33     

Qeyd: Şəxsi informasiyalar jurnalistlərin özləri tərəfindən təqdim edilib və məlumatlarda ola biləcək qeyri-dəqiqliyə görə www.azsport.az məsuliyyət daşımır.