Rusiyanın Xabarovsk şəhərində Sovet İttifaqı Qəhrəmanı Konstantin Korotkovun xatirəsinə boks üzrə beynəlxalq turnirə yekun vurulub. Boks federasiyasından idman.com.az saytına verilən məlumata görə, yarışda ölkəmizi təmsil edən 5 boksçudan üçü mükafatçılar sırasına düşüb. 56 kq çəki dərəcəsində çıxış edən Tural Əhmədov yarımfinalda rusiyalı Vyaçeslav Mirzəyevi məğlub etdikdən sonra həlledici görüşdə Qazaxıstan təmsilçisi Kayrat Yeraliyevlə qarşılaşıb. İki xal fərqlə (8:10) uduzan Əhmədov gümüş mükafata sahib olub. “Baku Fires” klubunun üzvü Abdulqadir Abdullayev də (91 kq) Xabarovskdan gümüş medalla dönüb.
Boksçumuz finalda rusiyalı Şamil Mataşevə 7:13 hesabı ilə məğlub olub. Superağır çəkidə yarışan Aleksandr Babiç də yalnız finalda uduzub. O, yarımfinalda hindistanlı Kumar Satişi üstələyib – 16:7. Babiç finalda London Olimpiadasının bürünc mükafatçısı İvan Dıçkoya (Qazaxıstan) müqavimət göstərməyə çalışsa da, məğlubiyyətdən xilas ola bilməyib – 3:9. Qeyd edək ki, komandamızın heyətində iki boksçu – İlkin Ağayev (60 kq) və Rafiq Əliyev (81 kq) mükafatçılar sırasına düşə bilməyiblər.
Xəbər 1039 dəfə oxundu.