Klublarda heç nə dəyişməyib
«Neftçi»də böyük iddialar heç də keçərli deyil
«Altılıq»da ilk rəsmi yer alan komanda «İnter»dir

Fasilə bitdi və milli futbol çempionatı yenidən bərpa olundu. Fasilə başa çatsa da, komandaların oyunlarında elə bir əsaslı yenilik görünmədi. Halbuki əksər komandaların əldə etdiyi oyunçular sayəsində əsaslı dəyişikliklər həm oyun elementlərində, həm hazırlıqda, həm də taktiki planda baş verməli idi. Bunun səbəblərini ötən saylarımızda öncədən geniş şəkildə əsaslandırmışdıq.

Məsələn, ilk baxışda «Neftçi» «Kəpəz» üzərində asan qələbə qazandı. Lakin komandanın quruculuğunda bu yaxınlara qədər Avropa Liqasında yarışmış və qarşısına böyük iddialar qoymuş komanda üçün heç də keçərli deyil. Əsas hücum silahını da sıraya qaytarmış klubun elə öz qayəsindən kənar çıxamayacağı məlumdur. Elə «İnter»dən də böyük yenilik gözlənilmirdi. Doğrudur, komanda səfərdə ən prinsipial rəqibdən 3 xal alaraq, pley-off mərhələsinə ilk rəsmi vəsiqə qazanan kollektiv oldu. Bununla belə ikinci hissədə «beynəlmiləlçilər»in də əvvəlki hazırlıqla müqayisədə çox da irəli getmədiyi və heyətini yetərincə möhkəmləndirmədiyi üzə çıxdı.

«Xəzər Lənkəran»ın oyununa birmənalı qiymət vermək olmur. İlk baxışda ikinci hissədə komandanın əvəzetmələri əvvəlki ilə müqayisədə nisbi irəliləyiş olduğunu göstərir. Lakin ilk yarıda cənblular matça fəal başlasalar və təzyiq edən tərəf olsalar da, oyunun ipini əldə saxlaya bilmədilər. İlk öncə ona görə ki, komanda qurucu-funksional oyunda tamamilə hazırlıqsız görünür. Üstəlik, məşqçi korpusu da, görünür, hələ lazım olan kollektivi formalaşdırmağa tam hazır deyil.

Eyni sözləri «Qəbələ» haqqında da söyləmək olar. Prinsipcə, komandanın əldə etdiyi oyunçular heyəti nisbətən gücləndirmək üçün yetərli görünür. Baş məşqçinin ilk dəfə öz istəyinə uyğun heyət qurmağa başlaması, əslində oyun planında heç nə dəyişməyib. «Qəbələ» liderlər qrupunda yer almağa çalışsa da, hələ ki ikinci planda oynamağa meyllidir. Bu isə Avropaya ayaq açmaq istəyən komanda üçün yolverilməzdir. Ələlxüsus da komandalarımızın ilkin mərhələlərdən mübarizəyə qoşulacağını nəzərə alsaq, bu məqama xüsusi diqqət edilməlidir.

AzAL-ın elə transferləri onun heç də uzaqvuran məqsədlərə xidmət göstərməyəcəyini əyani göstərdi. Bu mənada «Bakı» yenə iddialı görünmək istəyirdi və «Sumqayıt»la qarşılaşma problemlərin heç də transferlərlə bağlı olmadığını bir daha nümayiş etdirdi. Oyunda qonağı olaq gənclər şəhərinin təmsilçisi daha təsirli və öz imkanlarına görə effektli görünürdü. Hərçənd, o da məlumdur ki, «Sumqayıt» heç də istənilən səviyyənin kollektivi deyil. Çünki bir ara gənclərə üstünlük verən kollektivdə, sonradan dəst-xətdə dəyişiklik baş verdi. Kursun bəlli olmaması isə ümumi problemlərin aynasıdır. «Bakı» isə bu mənada yenidən dəyişəcək. Artıq bu indidən hiss olunur.

Əlbəttə, son 3 tur gərgin keçəcək. «Altılıq» səddində olan «Xəzər Lənkəran»la AzAL-ın həlledici görüşlərdə tək qalmayacağı məlumdur. Ümumən mübarizənin hələlik şərti olaraq 5 klub arasında getdiyini söyləmək olar. Hərçənd «yuxarılar»da yer almayacağı indidən təxmin edilən «Rəvan» «Turan»ı da məğlub etməklə onun şanslarına böyük zərbə endirdi. Hər halda iş elə gətirib ki, sabahkı matçlar tale yüklü olub və təxirə salınmış oyunlar nəyəsə aydınlıq gətirməklə yanaşı, həm də vəziyyəti tam müşkülə də çevirə bilər.

Əlbəttə, belə məqamlarda söhbət daha çox «qardaşlaşmış klublar»dan gedir. Çünki «altılıq»da yer alan komandalar özlərinə daha uyğun rəqibi bu sıraya «daxil etmək»lə yekunda şanslarını xeyli artıra bilərlər. Elə buna görə də oyunların ekspert səviyyəsində yaxından müşahidə edilməsi vacibdir və artıq bu barədə qərar da var. AFFA-nın daha bir formal qərarı bu günlərdə işıq üzü görüb. Belə addımlar Azərbaycan futbolunda ara-sıra atılıb. Lakin, əksərən, effekti bilinməyib. İndi isə bu, UEFA-nın tələbidir.

2011-ci il mayın 27-də UEFA göndərdiyi tələbə uyğun olaraq, razılaşdırılmış oyunlarla mübarizə aparmaq üçün nümayəndələrdən ibarət qrup yaradılmalıdır. Məqsəd danışılmış oyunların qarşısının alınmasıdır. Qrup şübhəli oyunları yoxlayıb qərar çıxaracaq. AFFA-dan yayılmış məlumatda bildirilir ki, son vaxtlar Premyer Liqanın növbəti turlarının bir sıra oyunları «razılaşdırılmış» kateqoriyasına daxil ola bilər və bunda futbolçuların iştirakı da ehtimal edilir. Buna görə də Apellyasiya və Ekspert Komitəsinin nəzdində futbol mütəxəssislərindən ibarət xüsusi qrup yaradılıb. Qrup oyunları diqqətlə izləyərək komitəyə məlumat verməlidir. UEFA-nın tələblərinə uyğun olaraq, qrupun fəaliyyəti məxfi saxlanılır.

BATI YAR

Xəbər 1086 dəfə oxundu.