“Lokomotiv” baş məşqçisi Pyotr Xilko ilə yollarını rəsmən ayırıb

“Lokomotiv” baş məşqçisi Pyotr Xilko ilə yollarını rəsmən ayırıb. “Dəmiryolçular”ı bu gün Çempionlar Liqasında Moskva “Dinamo”su ilə oyuna belaruslu çalışdırıcının çıxarmayacağı dəqiqləşib. Belə ki, Xilkonun fəaliyyəti rəhbərliyi qane etmədiyindən istefaya göndərilib. Artıq onun əvəzləyicisinin də adı rəsmən açıqlanıb. “Lokomotiv”i “Dinamo” ilə matça məşhur italiyalı məşqçi Cuzeppe Kuçarini çıxaracaq. Ölkəsi ilə yanaşı, Türkiyədə də işləyən təcrübəli çalışdırıcı ilə mövsümün sonuna kimi müqavilə imzalanıb. Bununla Super Liqada italiyalı baş məşqçilərin sayı 3-ə çatıb. Ondan öncə “Rabitə” Marçello Abbondanzaya, “Azərreyl” isə Alessandro Çiappiniyə etibar olunub. Qeyd edək ki, Azərbaycan çempionatının yeni mövsümündə ilk olaraq vəzifəsindən kənarlaşdırılan Xilko “Lokomotiv”lə Çempionlar Liqasında “Srvena Zvezda”ya 3:2, ölkə çempionatında isə “Telekom”a 3:0 hesabı ilə qalib gəlib.

Xəbər 900 dəfə oxundu.