Topaz Premyer Liqasının XI turunun ilk oyun günü 4 seriya ilə əlamətdar olub

Topaz Premyer Liqasının XI turunun ilk oyun günü 4 seriya ilə əlamətdar olub. Baş tutan 2 qarşılaşmada 2 seriya qırılıbsa, 2-si davam edib. Mövsümün rekordu Bu seriyalardan ikisi “İnter”in adı ilə bağlıdır. Bakılıların həm mövsümün, həm də klub tarixinin rekordu olan 5 oyunluq quru seriyası “Kəpəz”lə matçda qırıldı. Sonuncu dəfə avqustun 25-də “Turan”la matçda qol buraxan “İnter” 66 gündən sonra qapısında qol gördü. Qarşılaşmanın 5-ci dəqiqəsində paytaxt təmsilçisinin qapısına yol tapan Elxan Əzizov 561 dəqiqədən sonra “İnter”ə üzüntü yaşatdı. Rekordun təkrarı “Simurq”un 4 oyunluq quru seriyasını ötən tur qıran “İnter” Zaqatala təmsilçisinin daha bir rekorduna şərik olub. Sonuncu dəfə avqustun 10-da səfərdə “Qəbələ”yə uduzan bakılılar 8 qarşılaşmadır ki, yenilmir. Bununla da paytaxt təmsilçisi “Simurq”un ilk 8 turdakı mövsüm rekordunu təkrarlayıb. 81 gündür uduzmayan “İnter” bu 8 görüşdə 6 qələbə qazanıb və 2 heç-heçə edib. “Simurq”un 8 oyunluq məğlubiyyətsizlik seriyası isə 5 qələbə və 3 heç-heçə ilə əlamətdar olmuşdu. 45 gündən sonra “Bakı” və AZAL arasında paytaxt derbisi 5 oyundur qələbə qazana bilməyənlərin dueli olub. Sentyabrın 16-da “Qarabağ”ı 6:2 hesabı ilə məğlub etdikdən sonra uğursuzluq zolağına düşən AZAL 45 gündən sonra qalib gəlib. AZAL bunadək son 5 qarşılaşmada 3 heç-heçə edib 2 məğlubiyyətə üzülmüşdü. Antirekordun təkrarı “Bakı” isə mövsümün antirekorduna şərik olub. Paytaxtın eyniadlı təmsilçisi “Qəbələ” kimi ardıcıl 6 oyunda qələbə qazanmayıb. Avqustun 26-da “Kəpəz”i 3:1 hesabı ilə məğlub edən bakılılar 65 gündür qələbə qazanmır. Bu müddətdə “Bakı” 4 heç-heçə edib və 2 dəfə uduzub.

Xəbər 879 dəfə oxundu.