Aliyə Qarayeva final mərhələsi astanasında

Bu gün XXX London Yay Olimpiya Oyunlarında bədii gimnastika üzrə yarışın təsnifat mərhələsinə yekun vurulacaq. İdman.com.az saytının məlumatına görə, çoxnövçülük üzrə keçirilən turnirdə Azərbaycanı təmsil edən Aliyə Qarayeva daha 2 – gürz və iplə hərəkətlərdə bacarığını nümayiş etdirəcək. İlk günü 5-ci yerdə tamamlayan 24 yaşlı Avropa çempionumuz xalçaya müvafiq olaraq, 3-cü və 4-cü çıxacaq. Təsnifat mərhələsinin yekununa əsasən isə 10 idmançı finala yüksələcək. Qaliblər avqustun 11-də bilinəcək. Qeyd edək ki, Qarayeva yarışın birinci günündə həlqə (27,450) və topla (28,350) hərəkətlərdən sonra 55,800 xal toplayaraq, 5-ci yerdə qərarlaşıb. İlk 3 sırada rusiyalılar – Dariya Dmitriyeva (57,800), Yevgeniya Kanayeva (57,625) və belaruslu Lyubov Çarkaşina (56,450) yer alıb. 4-cü yerdə qərarlaşan Jae Son Yeon (Çin) isə təmsilçimizi 0,100 xal qabaqlayır.

Xəbər 1417 dəfə oxundu.