Tokio Olimpiadasının baş tutmasına 100 gün qalır. Dünya ictimaiyyəti sağlamlıq, ədalət və birliyin rəmzi olan növbəti Olimpiya Oyunlarının başlanmasını böyük həyəcan və dərin narahatlıqla gözləyirlər. Düzdür, sabah nələrin baş verəcəyini, insanları çaş-baş saxlamış bu təhlükəli virusun, koronavirus infeksiyasının bütün sahələrə, o cümlədən idmana bundan sonra da vuracağı zərbənin miqyasının hansı səviyyədə olacağını indidən söyləmək bir qədər çətindir. Pandemiya adi insanlarla yanaşı, idmançılar üçün də çox gözlənilməz olub və bəziləri bu stressə dözməyərək hətta karyeralarını bitirmək məcburiyyətində qalıblar, digərləri formalarını bərpa etmək üçün vəziyyətin düzəlməsini gözləyirlər. Bütün bunlara baxmayaraq Beynəlxalq Olimpiya Komitəsi (BOK) və Tokio Olimpiadasının təşkilat komitəsi, Yaponiya hökuməti Oyunları ən yüksək səviyyədə və təhlükəsiz şəraitdə keçirmək üçün gərgin səylər göstərir, tamaşaçılarsız, və ya tamaşaçılarla, necə olursa-olsun mütləq olimpiadanı keçirmək istəyirlər. BOK-un prezidenti Tomas Bax “Tokio-2020”nin dünyada tarixi Olimpiada kimi qəbul ediləcəyinə inandığını bildirib. Avropa Olimpiya Komitələrinin (AOK) baş katibi Rafael Paqnozzi isə “Tokio-2020” Yay Olimpiya Oyunlarının baş tutmasının böyük idmanın qayıdışı kimi xarakterizə olunacağını vurğulayıb.
Sözsüz ki, Oyunların təşkilində müəyyən məhdudiyyətlərin tətbiqi onu əvvəlki olimpiadalardan fərqləndirəcək. Son günlər daha bir qərarın qəbulu gözlənilir. Belə ki, Yaponiya hökuməti “Tokio-2020” Yay Olimpiya və Paralimpiya Oyunlarına gələcək rəsmi qonaqların sayını iki dəfə azaltmaq imkanlarını araşdırır. Bildirilir ki, hazırda Olimpiya Oyunlarına təqribən 90 min xarici qonağın gələcəyi gözlənilir. Onların təqribən 30 mininin idmançılardan, komandaların digər üzvlərindən və xidmət heyətindən ibarət olacağı qeyd edilir.
Bundan əvvəl isə təşkilatçılar yarışlara qatılmaq istəyən əcnəbi azarkeşlərin koronavirusla əlaqədar yaranmış vəziyyətə görə ölkəyə buraxılmaması barədə razılığa gəliblər. Halbuki “Tokio-2020”nin təşkilat komitəsinin rəhbəri Seyko Haşimoto Yaponiyanın “Asahi” və “Yomiuri” qəzetlərinə müsahibəsində bildirmişdi ki, koronavirus pandemiyası ilə bağlı vəziyyətə baxmayaraq, Tokioda keçiriləcək Yay Olimpiya və Paralimpiya Oyunlarını tamaşaçıların izləmələrinə icazə verilməlidir. O, bunu hazırkı vəziyyətdə digər yarışlara tamaşaçıların buraxılması ilə əlaqələndirmişdi.
İdman obyektlərində yaponiyalı azarkeşlərə hər hansı məhdudiyyətin tətbiq edilib-edilməyəcəyi də sual altındadır və buyaxınlarda bu məsələyə aydınlıq gələcək.
Daha bir məhdudiyyət əcnəbi könüllülərin iştirakı ilə bağlıdır. Artıq əcnəbi könüllülərin Oyunlara dəvət olunmayacağı ilə bağlı da qərar qəbul edilib.
Tokio Yay Olimpiya və Paralimpiya Oyunlarının əcnəbi tamaşaçılarsız keçirilməsinə görə, Yaponiya 150 milyard yen (təqribən 1,37 milyard dollar) itirəcək. Bu hesablama daxili bazarın təhlili və koronavirus pandemiyasına qədər əcnəbi turistlərin istehlak səviyyəsi nəzərə alınaraq aparılıb. Qəbul edilən qərarın daha çox mehmanxana və restoran biznesinə ziyan vuracağı bildirilir. Bununla yanaşı, qeyd edilir ki, Oyunların təşkilatçıları yapon tamaşaçıların yarışlar zamanı idman obyektlərinə buraxılmaması barədə qərar qəbul edəcəyi təqdirdə bu iqtisadi zərər daha da arta bilər. İndiyədək olimpiadaya 4,4 milyon, paralimpiadaya isə 970 min bilet satılıb. Biletlərin 1 milyonunu xaricilər alıblar.
Onu da qeyd edək ki, Olimpiadanın təxirə salınması və koronavirusa qarşı tədbirlərlə bağlı əlavə xərclərə görə yarışların təşkili büdcəsi artıq 1,64 trilyon yenə (təqribən 15,9 milyard dollar) çatıb.
“Tokio-2020”nin məşəl estafetinin start götürməsinə baxmayaraq onun formatının dəyişdirilməsi ilə bağlı söz-söhbət də davam edir. Bir neçə gün bundan əvvəl Seyko Haşimoto Yaponiyanın bu və ya digər prefekturasında COVID-19 pandemiyasına görə yaranacaq vəziyyətdən asılı olaraq Tokio Olimpiadasının məşəl estafetinin formatının dəyişdirilə biləcəyini də bəyan edib.
Qeyd edək ki, cari həftə Osaka prefekturası koronavirusla əlaqədar vəziyyət gərginləşdiyinə görə lokal fövqəladə vəziyyət rejimi tətbiq edərək, bu prefekturanın ərazisində Olimpiya məşəlinin gəzdirilməsini qadağan edib. Nəticədə, mərasim prefekturanın yalnız bir şəhərindəki parkda qısa formatda və tamaşaçılarsız keçiriləcək.
Olimpiya məşəli estafeti Yaponiyada martın 25-də Fukusima prefekturasındakı “J-Village” təlim-məşq bazasında başlayıb. Estafet ümumilikdə 121 gün davam edəcək və məşəlin 47 prefekturasının 859 bələdiyyəsində hərəkəti nəzərdə tutulur. Estafetdə təqribən 10 min nəfərin iştirak edəcəyi gözlənilir.
Bugünlərdə Koreya Xalq Demokratik Respublikasının (KXDR) Olimpiadada iştirak etməyəcəyi ilə bağlı məlumat yayılıb. "Yonham" agentliyinin verdiyi məlumata görə, bu addım idmançıları koronavirus infeksiyasından qorumaqdan ötrü atılıb. Belə bir qərar KXDR Milli Olimpiya Komitəsinin iclasında qəbul edilib. Amma ümumilikdə götürdükdə, lisenziya xarakterli yarışlarda dünya ölkələrinin komandaları böyük heyətlə iştirak edərək lisenziya əldə etmək üçün böyük ruh yüksəkliyi ilə mübarizə aparırlar.
Artıq bəzi idman növləri üzrə lisenziya yarışlarının böyük bir hissəsi başa çatıb və vəsiqə sahibləri müəyyənləşib.
Dünyada kütləviliyi ilə birinci yerdə qərarlaşan futbol üzrə isə artıq “Tokio-2020” də mübarizə aparacaq bütün komandalar müəyyənləşib. Belə ki, “Tokio-2020”də Yaponiya, Argentina, Avstraliya, Braziliya, Kot d İvuar, Misir, Fransa, Almaniya, Honduras, Koreya Respublikası, Meksika, Yeni Zelandiya, Rumıniya, Səudiyyə Ərəbistanı, Cənubi Afrika Respublikası və İspaniya komandaları mötəbər yarışa vəsiqə qazanıblar.
Düzdür, lisenziya yarışları ilə bağlı bəzi problemlər yaranıb. Olimpiya seçmə mərhələlərinin bəziləri ləğv edilib, digərləri təxirə salınıb, yaxud idmançıların reytinqə görə vəsiqə əldə edəcəklərinə təminat verilib.
Bu arada Yaponiyanın təşkilati işlərdə böyük təcrübəsi olan ölkələrdən Tokio-2020 Olimpiya Oyunlarının keçirilməsində dəstək istəməsi vəziyyətin nə qədər ciddi olduğunu göstərir. Yaponiya Nazirlər Kabinetinin Baş katibi Katsunobu Kato tərəfindən edilən müraciətdə idman yarışlarının keçirilməsi istiqamətində böyük təcrübəsi olan ölkələrin kadr potensialının Yaponiyaya göndərilməsi kimi müraciət öz əksini tapıb. Müraciətə cavab olaraq gənclər və idman naziri Azad Rəhimov Azərbaycanın 2015-ci ildə ilk Avropa Oyunları, 2017-ci ildə IV İslam Həmrəyliyi Oyunları, 2016, 2017, 2018, 2019-cu illərdə Formula 1, 2019-cu ildə XV Avropa Gənclər Olimpiadası kimi beynəlxalq yarışlara çox böyük uğurla ev sahibliyi etdiyini bildirib. Bu məqsədlə, nazir Tokioda baş tutacaq Olimpiya Oyunlarında Azərbaycanın təcrübəli kadr potensialı ilə dəstək göstərməsinin mümkünlüyünü qeyd edib.
Azərbaycanın Yaponiyadakı səfiri Gürsel İsmayılzadə bu ölkənin parlamentinin müşavirlər palatasının deputatı, Azərbaycan-Yaponiya parlamentlərarası əlaqələr üzrə işçi qrupunun üzvü Kentaro Asahi ilə görüşündə əsas mövzu olaraq təxirə salınmış “Tokio 2020” Olimpiya və Paralimpiya Oyunlarının 2021-ci ilin yayında təşkili və Azərbaycan idmançılarının bu beynəlxalq yarışda iştirakı məsələləri müzakirə edilib.
Koronavirus pandemiyasına baxmayaraq, bu oyunların yüksək səviyyədə və təhlükəsiz şəkildə keçiriləcəyini qeyd edən Kentaro Asahi Yaponiya tərəfinin Azərbaycan idmançılarının iştirak edəcəyinə ümidvar olduğunu bildirib.
Azərbaycanın “Tokio-2020”də iştirakına gəlincə, vurğulayaq ki, komandamız ölkəmizi bu mötəbər oyunlarda layiqincə təmsil etmək üçün bütün imkanlardan istifadə edir. Koronavirus pandemiyasının yaratdığı çətinliklərə və maneələrə baxmayaraq lisenziya xarakterli yarışlarda idmançılarımızın iştirakı təmin edilir, yüksək nəticələrin əldə edilməsi üçün hazırlıq davam etdirirlir.
Azərbaycan idmançıları Tokio Olimpiadasına indiyədək 16 lisenziya qazanıblar. Lisenziyalar atletika (2), atıcılıq (1), bədii gimnastika (2), idman gimnastikası (2), sərbəst güləş (3), qadın güləşi (1), yunan-Roma güləşi (1), üzgüçülük (1), velosiped (şose, 1), boks (1), taekvondo (1) üzrə əldə edilib.
Olimpiya Oyunlarına vəsiqəni atletika üzrə Anna Skidan (çəkicatma), Nazim Babayev (üç təkanla tullanma), üzgüçülük üzrə Maksim Şemberev (400 m qarışıq), qadın güləşi üzrə Mariya Stadnik (50 kq), sərbəst güləş üzrə Şərif Şərifov (97 kq), Hacı Əliyev (65 kq), Hacımurad Hacıyev (74 kq), yunan-Roma güləşi üzrə İslam Abbasov (87 kq), bədii gimnastika üzrə Zöhrə Ağamirova (çoxnövçülük), Aliyə Paşayeva, Diana Əhmədbəyli, Darya Sorokina, Ayşən Bayramova, Zeynəb Hümmətovadan ibarət qrup hərəkətləri komandası (qrup, çoxnövçülük), idman gimnastikası üzrə Marina Nekrasova (çoxnövçülük), İvan Tixonov (çoxnövçülük), güllə atıcılığı üzrə Ruslan Lunyov (25 metr məsafəyə kiçikçaplı tapançadan atəşaçma), taekvondo üzrə Milad Beigi Harçeqani (80 kq), boks üzrə Tayfur Əliyev (57 kq) qazanıblar. Həmçinin, Azərbaycan millisi şose velosipedi idman növündə 1 lisenziyaya sahib olub.
XVI Yay Paralimpiya Oyunlarına isə indiyədək 9 lisenziyamız var. lisenziyalar atletika (3), atıcılıq (2), üzgüçülük (3) və pauerliftinq (1) üzrə əldə edilib. Vəsiqələri atletika üzrə Oloxan Musayev, Samir Nəbiyev, Kamil Əliyev, üzgüçülük üzrə Raman Salei, Dana Şandıbina, Vəli İsrafilov, güllə atıcılığı üzrə Yelena Taranova, Kamran Zeynalov, pauerliftinq üzrə Elşən Hüseynov qazanıblar.
Bəzi idman növlərində lisenziya reytinqlə müəyyənləşdiyi üçün yarışlar bitdikdən sonra vəsiqə sahiblərinin adları açıqlanacaq.
Xatırladaq ki, komandamız olimpiadalarda ən böyük uğurunu son Oyunlarda - Rio-de-Janeyroda keçirilmiş Olimpiya Oyunlarında qazanıb. Belə ki, 2016-cı ildə keçirilmiş XXXI Yay Olimpiya Oyunlarında Azərbaycan 56 idmançı ilə 17 idman növündə təmsil olunaraq 1 qızıl, 7 gümüş və 10 bürünclə medalların əyarına görə 206 dövlət sırasında 39-cu yeri, sayına görə isə 15-ci yeri tutub. Olimpiadadan-olimpiadaya medalların sayını artıran və nəticələrini yaxşılaşdıran olimpiyaçılarımızdan növbəti Oyunlarda da parlaq qələbələr gözləyirik.
Xəbər 566 dəfə oxundu.