««Zestafoni» elə də zəif rəqib deyildi. İlk dəqiqələrdən üstünlüyü ələ alıb 2 qol vurdular. Ancaq komandamız ruhdan düşmədi, cəsarət, əzm nümayiş etdirib hesabı bərabərləşdirdi. Matçın böyük hissəsini komandamız oyuna diqtə edən tərəf oldu. Bu onu göstərir ki, mövsümə yaxşı hazırlaşmışıq.«Neftçi»yə çox inanırdım. Özüm də futbolçulara dəstək olmaq üçün bura gəlmişdim. Bura gəlib bizə dəstək olan azarkeşlərə və jurnalistlərə də təşəkkürümü bildirirəm». Bu açıqlamanı «İdman» qəzetinin və idman.com.az saytının Gürcüstana ezam olunmuş əməkdaşına «Neftçi» klubunun prezidenti Sadıq Sadıqov verdi.
Çempionlar Liqasının 2-ci təsnifat mərhələsinin cavab görüşündə səfərdə «Zestafoni» ilə qarşılaşan «ağ-qaralar» 2:2 heç-heçə etməklə (ilk oyunda 3:0 qalib gəlmişdi), növbəti mərhələyə adladı. Bu raundda bayraqdar İsrailin «Hapoel» (Kiryat Şmona) kollektivi ilə görüşəcək. Altıqat ölkə çempionun prezidenti dedi ki, rəqib güclüdür. Amma biz də zəif deyilik:
««Hapoel» İsrail çempionudur, güclü rəqibdir. Tur keçiblərsə, demək, onların da müəyyən iddiaları var. Rəqibi yaxşı təhlil edəcəyik. Növbəti mərhələdə də yaxşı oynamağa çalışacağıq. Güclü heyətimiz var. Əlavə transfərlərə ehtiyac görmürəm. Yeni futbolçuların komandaya uyğunlaşması üçün vaxt lazımdır. Bu baş verəndən sonra, «Neftçi» daha səviyyəli oyun nümayiş etdirəcək. Cari mövsümün avroliqa yarışlarında qarşımıza ciddi məqsədlər qoymuşuq. Ona yetişmək üçün imkanımız da var. Birgə bunun öhdəsindən gəlməyi bacaracağıq».
Kamran Hacı. Zestafoni, Gürcüstan
Xəbər 1050 dəfə oxundu.