AVRO-2012-nin final mərhələsinə yekun vurulub

AVRO-2012-nin final mərhələsinə yekun vurulub. İdman.com.az saytının məlumatına görə, çempionatın son oyununda İspaniya və İtaliya milli komandaları üz-üzə gəlib. Kiyevdə keçirilən final matçında AVRO-2012-nin qalibi müəyyənləşib. 24 günlük marafonun sonunda yenə sevinən İspaniya olub. Finalda rəqibini 4:0 hesabı ilə məğlub edərək baş mükafata sahib çıxan İspaniya millisi ardıcıl ikinci dəfə Avropa çempionluğunu yaşayan komanda kimi tarixə düşüb. Üstəlik ispanlar ardıcıl olaraq Avropa çempionu (2008), dünya birincisi (2010) və yenidən qitənin baş mükafatına sahib çıxan (2012) ilk komanda olub. İtaliya millisi isə final matçını azlıqda keçirməsi ilə tarixə keçib. Belə ki, matçın 57-ci dəqiqəsində meydana çıxan Tiaqo Motta az sonra zədələnərək görüşü davam etdirə bilməyib. Motta İtaliya millisinin sonuncu dəyişikliyi olduğundan komanda oyunu 10 nəfərlə davam etdirmək məcburiyyətində qalıb ki, bu da Avropa çempionatında bir ilk olub. "Avro-2012"də İspaniya millisinin heyətində debüt matçına çıxan Xuan Matanın 1 dəqiqə sonra fərqlənməsi də turnirə damğasını vurub. İspaniya millisinin hücumçusu Fernando Torres isə hər iki finalda fərqlənən futbolçu kimi adını tarixə yazdırıb. Bununla belə, meydana sonradan daxil olan hər iki futbolçunun rəqib qapısına yol tapması da Avropa çempionatları tarixi üçün bir yenilik olub. "Avro-2012"də ən çox maraq doğuran rekordlardan biri isə turnirin bombardirinin kimliyi ilə bağlıdır. Belə ki, turnirdə 6 yığmanın 6 futbolçusu 3 dəfə fərqlənsə də, aşkar bombardir bəlli olmayıb. Maraq üçün xatırladaq ki, Alan Zaqoyev (Rusiya), Mario Qomez (Almaniya), Mario Mandzukiç (Xorvatiya), Kriştiano Ronaldo (Portuqaliya), Mario Balotelli (İtaliya) və Fernando Torres (İspaniya) hərəyə 3 dəfə fərqlənməklə şərik bombardirlər kimi Avropa çempionatının tarixinə düşüblər. Final matçında qeydə alınan 4:0-lıq qələbə də Avropa çempionatları tarixində ilk böyükhesablı nəticə olub. Qeyd edək ki, oyunu izləyənlər arasında AFFA rəhbərliyi də olub. Qurumun prezidenti Rövnəq Abdullayev və baş katibi Elxan Məmmədov Kiyevdəki “Olimpiyski” stadionundan matçı canlı izləyiblər. AVRO-2012 Final İSPANİYA – İTALİYA - 4:0 Baş hakim: Pedro Proensa (Portuqaliya) Kiyev. “Olimpiyski” stadionu

Xəbər 987 dəfə oxundu.