İlk gündə 1 «qızıl» və 2 «bürünc»
Xorvatiya paytaxtı Zaqrebdə gənc güləşçilər arasında Avropa çempionatı keçirilir. İdman.com.az saytının məlumatına görə, yarışın ilk günündə sərbəst güləş üzrə 4 çəki dərəcəsində ən güclülər müəyyənləşib. Azərbaycan millisi bu çəkilərdə 1 qızıl və 2 bürünc medal qazanıb.

Belə ki, 60 kq çəki dərəcəsində Əhmədnəbi Qvarzatilov bütün rəqiblərindən üstün olub. Təmsilçimiz qələbəyə gedən yolda Moldova, Albaniya, Rusiya və Türkiyə güləşçilərini məğlubiyyətə uğradıb.

74 kq çəkidə Elcan Usubzadə və 96 kq-da Səid Həmidov çempionatın bürünc mükafatını qazanıblar. Həlledici görüşdə güləşçilərimiz müvafiq olaraq, ukraynalı Sergey Odinak və gürcü Omar Qusoşviliyə qalib gəliblər.

Bu gün gənclərin Avropa çempionatında böyük məşqçi Arif Abdullayev və məşqçi Rövşən Hacıyevin rəhbərliyi ilə Qalib Əliyev (55 kq), Bəxtiyar İsrafilli (66 kq), Pərviz Axundov (84 kq) və Əli Maqomedibirov (120 kq) mübarizəyə qoşulacaq.

Xəbər 929 dəfə oxundu.