“Qəbələ”nin Türkiyədə keçirəcəyi sonuncu yoxlama oyunundakı rəqibi dəyişib

Mövsümün ikinci yarısına hazırlığı davam etdirən “Qəbələ” futbol klubunun Türkiyədə keçirəcəyi sonuncu yoxlama oyunundakı rəqibi dəyişib. Azsport.az kluba istinadla xəbər verir ki, “qırmızı-qaralar” Antalya şəhərindəki təlim-məşq toplanışındakı dördüncü matçda Rumıniyanın “Konkordiya” klubu ilə görüşəcək. Bu matç yanvarın 25-də baş tutacaq. Öncədən həmin gün Bolqarıstanın “Dunav” klubu ilə qarşılaşma nəzərdə tutulsa da, rəqib Rumıniyanın ikinci liqa təmsilçisi olacaq. Xatırladaq ki, Antalyada iki yoxlama matçı keçirən “Qəbələ” Macarıstanın MTK klubuna 0:3 hesabı ilə uduzub, Rusiya təmsilçisi “Çayka”ya eyni hesabla qalib gəlib. Komandamız yanvarın 22-də Bolqarıstanın “Etar” klubu ilə üz-üzə gələcək.

Xəbər 688 dəfə oxundu.