Bu il Azərbaycan Velosiped İdmanı Federasiyası üçün uğurlu nəticələrlə yadda qalıb
Başa çatmaqda olan 2019-cu il Azərbaycan Velosiped İdmanı Federasiyası üçün uğurlu nəticələrlə yadda qalıb.

Bu fikirlər Respublika Velotrekində keçirilən ilin yekun toplantısında səsləndirilib.

Tədbirdə hesabat məruzəsi ilə çıxış edən federasiyanın baş katibi Fərhad Əliyev bildirib ki, ilin əsas hadisəsi Azərbaycan yığma komandası üzvlərinin şose velosipedinin qrup ötüşməsində “Tokio 2020” Yay Olimpiya Oyunlarına lisenziya qazanması olub. “Rio 2016” Yay Olimpiya Oyunları ilə müqayisədə Tokio Olimpiadası üçün iştirakçı sayının 150-dən 130-a endirilməsi mübarizəni daha da çətinləşdirib. Bütün lisenziya yarışlarında iştirak edən yığmamızın üzvləri 894 xal toplayıb və dünya reytinqində 44-cü olmaqla arzuolunan lisenziyaya sahib çıxıb.

Bildirib ki, bu yarışlar zamanı millimizin lider idmançıları Elçin Əsədov və Samir Cəbrayılov Avropa, Asiya və Afrikada keçirilən yarışlarda 12 dəfə fəxri kürsüyə qalxıblar. Bundan başqa, gənc oğlan və qızlardan ibarət yığma komanda üzvlərindən Nəcəf Bağırov, Nikita Sıtov və Lalə Əbdürrəhmanova İran, Belçika və Türkiyədə keçirilən beynəlxalq yarışların qalib və mükafatçısı olublar.

“İl ərzində əldə olunan nailiyyətlər ölkə idmanı rəhbərliyinin də diqqətindən kənarda qalmayıb. Milli Olimpiya Komitəsində 2019-cu ilin idman yekunlarına həsr olunan mərasimdə Azərbaycan Prezidenti İlham Əliyev yığma komandamızın baş məşqçisi Əbülfəz Məmmədovu mənzillə təltif edib. Bundan başqa, Gənclər və İdman naziri Azad Rəhimovun müvafiq əmri ilə Əbülfəz Məmmədova Əməkdar məşqçi, ölkəmizi “Tokio 2020” Yay Olimpiya Oyunlarında təmsil edəcək Elçin Əsədova isə Əməkdar idman ustası fəxri adları verilib”, - deyə F.Əliyev əlavə edib.

İclasa yekun vuran Azərbaycan Velosiped İdmanı Federasiyasının birinci vitse-prezidenti, Avropa Velosipedçilər Birliyi Direktorlar Komitəsinin üzvü Sahib Ələkbərov növbəti ildə federasiyanın qarşısında duran əsas vəzifələrdən danışıb və il ərzində fərqlənən idmançı və məşqçilərə fəxri diplomlar təqdim edib.


Xəbər 1203 dəfə oxundu.