Xaçmaz rayonunda səmti müəyyən etmə idman növü üzrə yarış keçirilib

Samur-Yalama Milli Parkının Xaçmaz rayonunda yerləşən meşə zolaqlarında səmti müəyyən etmə idman növü üzrə keçirilən yarışda 50-dən çox iştirakçı mübarizə aparıb. Samur-Yalama Milli Parkı və Azərbaycan Səmti Müəyyən Etmə İdman Federasiyasının birgə təşkilatçılığı ilə keçirilən yarış Milli Parkla tanışlıq, səmti müəyyən etmənin ölkəmizdə kütləvi idman növü kimi tanınması, ekoturizmin, sağlam həyat tərzinin və ətraf mühitə qayğı ilə yanaşmanın təbliği məqsədi daşıyıb. Turnirin əvvəlində Samur-Yalama Milli Parkının direktoru Budaq Əliyev yarış iştirakçılarına park haqqında ətraflı məlumat verib. Bildirilib ki, Milli Park ətraf mühitin mühafizəsi, ondan səmərəli istifadə edilməsi, bioloji müxtəlifliyin, o cümlədən nadir və nəsli kəsilməkdə olan bitki və heyvan növlərinin qorunub saxlanılması və ekoturizmin inkişaf etdirilməsi məqsədilə Azərbaycan Respublikası Prezidentinin Sərəncamı ilə Xaçmaz rayonunun inzibati ərazisində yaradılıb. Parkın ərazisi 11 min 772 hektar sahəni əhatə edir. Burada 5 ekoturizm marşrutu fəaliyyət göstərir. Birincilik elektron qeydiyyat sisteminin tətbiqi ilə keçirilib. Uzun və orta məsafə üzrə keçirilən turnirdə idmançılar müxtəlif yaş kateqoriyası üzrə yarışıblar. Yarışda fərqlənən idmançılara medal və diplomlar təqdim olunub.

Xəbər 709 dəfə oxundu.