Budapeştdə Avropa Ədalətli Oyunlar Hərəkatının 25-ci konqresi keçirilir.Tədbir çərçivəsində bu gün Budapeştdə Dünya Ədalətli Oyunlar Komitəsi mükafatlarının təqdim edilməsi mərasimi keçirilib.
Mərasimdə Azərbaycan tərəfindən Gənclər və İdman naziri Azad Rəhimov, Azərbaycan Ədalətli Oyunlar Komissiyasının (AzƏOK) sədri, Milli Olimpiya Komitəsinin vitse-prezidenti Xəzər İsayev, ölkəmizin Macarıstandakı səfiri Vilayət Quliyev və digər şəxslər iştirak ediblər.
Budapeştdəki “City Hall”da keçirilən tədbirdə Beynəlxalq Ədalətli Oyunlar Komitəsinin (BƏOK) prezidenti Jeno Kamuti çıxış edərək tədbir iştirakçılarını salamlayıb, qurumun fəaliyyəti və təqdim olunacaq “Fair Play” mükafatları barədə məlumat verib.
Budapeşt Şəhər Bələdiyyəsi sədrinin müavini Aleksandra Şalay-Bobrovinski, Dövlət katibinin müavini Petr Sarfalvi də tədbir iştirakçılarına salamlarını çatdırıb, ölkələrinin idmana və ədalət prinsiplərinə daim önəm verdiyini bildiriblər.
Musiqili proqramla davam edən tədbirin gedişində ədalətli oyun prinsipləri mövzusunda film nümayiş olunub.
Daha sonra mükafatlar sahiblərinə təqdim olunub. Tədbirdə elan edilib ki, Azərbaycan Respublikasının Gənclər və İdman naziri Azad Rəhimov Beynəlxalq Ədalətli Oyunlar Komitəsinin qərarı ilə “2018-ci il Dünya Ədalətli Oyunlar Mükafatı”nın “Ədalətli oyun ruhunda keçən idman karyerası və həyat” kateqoriyasında Fair Play mükafatına layiq görülüb. Nazir Azad Rəhimova mükafatı təşkilatın prezidenti Jeno Kamuti təqdim edib.
Nazir Azad Rəhimov tədbirdəki çıxışında Azərbaycanda idmanın uğurlu inkişafı, dövlətimizin başçısı, Milli Olimpiya Komitəsinin prezidenti İlham Əliyevin idmanın inkişafına göstərdiyi yüksək diqqət və qayğıdan danışıb, mükafata layiq görüldüyünə görə təşəkkürünü bildirib.
Sonda mükafat sahibləri xatirə şəkilləri çəkdiriblər.
Xəbər 1253 dəfə oxundu.