Boks üzrə muxtar respublika turnirinə yekun vurulub

Azərbaycan xalqının ümummilli lideri Heydər Əliyevin anadan olmasının 96-cı ildönümünə həsr olunmuş boks üzrə “Heydər Əliyev kuboku” uğrunda muxtar respublika turnirinə yekun vurulub. Naxçıvan Muxtar Respublikası Gənclər və İdman Nazirliyi ilə Boks Federasiyasının birgə təşkil etdiyi yarış üç gün davam edib. Beynəlxalq Boks Federasiyasının qaydalarına uyğun olaraq keçirilən turnirdə 2001-2002-ci illər təvəllüdlü gənclər, 2003-2004-cü illər təvəllüdlü yeniyetmələr 12 çəki dərəcəsində mübarizə aparıblar. Mayın 2-də turnirin bağlanış mərasimi keçirilib. Azərbaycan Respublikasının Dövlət Himni səsləndirildikdən sonra final görüşlərinə start verilib. Yarışın yekun nəticələrinə əsasən 38, 40, 42, 46, 50, 54, 57, 60, 64, 69, 75 və +81 kiloqram çəki dərəcələrində müvafiq olaraq Sinan Əbilov, Ramil Babayev, Alişan İsmayılov, Nazim Abazərli, Nizami Novruzov, Ayxan Quliyev, Hüseyn Hüseynov, Ayxan Süleymanov, Cəbi İsayev, İbrahim Cəfərzadə, Yuris Allahverdiyev və Sərvər Abdullayev turnirin qalibi adını qazanıblar. Qızların mübarizəsində isə Duyğu Hüseynova (48 kiloqram) və Nuray Hümbətova (50 kiloqram) hamıdan güclü olublar. Komanda hesabında “Naxçıvan” komandası turnirin baş mükafatını qazanıb. Sonda qaliblər diplom və hədiyyələrlə mükafatlandırılıb. Qaliblərə mükafatları Naxçıvan Muxtar Respublikası Boks Federasiyasının sədri Məhərrəm Talıbov və Azərbaycan Respublikası gənclər və idman nazirinin müavini İsmayıl İsmayılov təqdim ediblər.

Xəbər 725 dəfə oxundu.