Kunq-fu üzrə Azərbaycan çempionatında 500-dən artıq idmançı birincilik uğrunda mübarizə aparacaq

Mayın 4-5-də “Sərhədçi” İdman Olimpiya Mərkəzində kunq-fu üzrə Azərbaycan çempionatı təşkil olunacaq. Yarışda 30 klubdan 500-dən artıq idmançı birincilik uğrunda mübarizə aparacaq. Bu sözləri müsahibəsində Azərbaycan Kunq-fu Federasiyasının vitse-prezidenti Tural Alışanlı deyib. Vitse-prezident diqqətə çatdırıb ki, yeniyetmələr, gənclər və böyüklər arasında təşkil olunacaq yarışın baş hakimi Babək Əliyev, baş katibi isə Rəcəb Məmmədov olacaq. İki gün davam edəcək yarışa ölkəmizin ən güclü idmançıları qatılacaqlar. “Federasiya tərəfindən idmançılar üçün hər cür şərait yaradılıb. Bir neçə gün əvvəl Azərbaycan Kunq-fu Federasiyasının prezidenti Nurlan Aslanov idmançılarla görüşüb və gələcək yarışlara hazırlıqla bağlı onlarla fikir mübadiləsi aparıb. Bu il idmançılarımızı ciddi sınaqlar gözləyir. İnanıram ki, milli komandamızın üzvləri beynəlxalq arenada ölkəmizi layiqincə təmsil edib, himnimizi səsləndirəcəklər”, - deyə T.Alışanlı əlavə edib. Qeyd edək ki, çempionat Gənclər və İdman Nazirliyi, Milli Olimpiya Komitəsi və Azərbaycan Kunq-fu Federasiyasının birgə təşkilatçılığı ilə keçiriləcək. AZƏRTAC

Xəbər 813 dəfə oxundu.