Sənan Qurbanov: “Qarabağ” hər baxımdan komandamızdan güclü idi

Oyunla bağlı planlaşdırdıqlarımızın heç biri alınmadı. Bunu da rəqibin bizdən güclü olması ilə əlaqələndirərdim. Hər komponentdə bizdən üstün idilər. Həm topa çox nəzarət etdilər, həm mübarizədə, xüsusilə, ikinci hissədə güclü idilər. 90 dəqiqə müdafiə olunmağa məcbur qaldıq, bu da futbolçuların gücünün tükənməsi ilə nəticələndi. Rəqibimiz təcrübəli komandadır. Bu sözləri “Qəbələ” klubunun baş məşqçisi Sənan Qurbanov Azərbaycan Premyer Liqasının 11-ci turu çərçivəsində “Qarabağ”la oyundan sonra təşkil olunmuş mətbuat konfransında deyib. “İlk hissədə əzmkarlıq var idi. Düşünürəm ki, məğlub olmuşuqsa, deməli, zəif oynamışıq. Rəqibi meydanın onlara aid hissəsində qarşılamaq, topla oynamaq istəyirdik. Amma bunların heç biri alınmadı. Əgər oyun boyu müdafiə olunursansa, məğlub olmaq ehtimalın artır”, - baş məşqçi qeyd edib.

Xəbər 875 dəfə oxundu.