9-13 mayda Heydər Əliyevin xatirəsinə 23 yaşadək velosipedçilər arasında velotur keçiriləcək. İdman.com.az saytının məlumatına görə, artıq idmançıların səmt alacağı marşrut müəyyənləşib. Ölkəmizdə ilk dəfə təşkil ediləcək 5 mərhələlik yarışa Bakıda start veriləcək. Komanda yarışından sonra peloton Böyük Qafqaz dağlarına doğru istiqamətlənəcək və orada növbəti 3 mərhələ keçiriləcək. Veloturun ən şimal nöqtəsi olan Şəkiyə çatdıqdan sonra yarış iştirakçıları Bakıya qayıdacaq. Yarış marşrutu çoxsaylı beynəlxalq turların təşkilində böyük təcrübə toplamış, o cümlədən 2007-ci ildə UCİ-nin himayəsi altında keçirilmiş şose üzrə dünya çempionatının təşkilatçısı olan Albrext Roeder tərəfindən planlaşdırılıb.
I mərhələ: Bakıda komanda sınaq yarışı (30 km)
Yarış paytaxt Bakıda 30 kilometrlik məsafədə komanda sınaq yarışları ilə açılacaq. Velosipedçilər turu Azadlıq meydanından başlayıb orada da yekunlaşdıracaqlar. Bu mərhələ, demək olar ki, tamamilə enişsiz-yoxuşsuz marşrut üzrə keçiriləcək. Velosipedçilərə yalnız Xəzərdən əsən Gilavar müəyyən çətinlik yarada bilər.
II mərhələ: Bakı - İsmayıllı (176 km)
Komanda yarışlarından sonra velosipedçilər 2-ci mərhələ çərçivəsində Bakı-İsmayıllı marşrutu üzrə 176 km. məsafə, o cümlədən Böyük Qafqaz dağlarında 3 yüksəklik qət edəcəklər. 150 kilometrdən sonra pelaton veloturun ən yüksək nöqtəsinə çatacaq və enişli yolla İsmayıllıya – finiş xəttinə istiqamətlənəcək.
III mərhələ: Qəbələ - Qəbələ (160 km)
3-cü mərhələ 20 kilometrlik enişli yolla başlayacaq. Sonra velosipedçilər Oğuz və Şəki istiqamətində yüksəklikləri qət edərək yenidən Qəbələyə gələcəklər. 160 kilometrlik çətin keçilən məsafəni geridə qoyan yarış iştirakçıları 782 metrlik yoxuşlu yolla finiş xəttinə çatacaqlar.
IV mərhələ: İsmayıllı – Qəbələ (114 km)
Dördüncü mərhələnin başlanması üçün iştirakçılar İsmayıllıya qayıdacaqlar. 35 kilometrdən sonra pelaton Qəbələyə çatacaq. Burada yarış iştirakçıları 12 dövrə vuracaqlar. İdmançıları çətin sınaq gözləyir – onlar hər dövrə çərçivəsində 798 metrlik hündürlüyə qalxacaqlar.
V mərhələ: Bakı – Bakı (123 km)
Veloturun sonuncu – beşinci mərhələsinin keçirilməsi üçün iştirakçılar Bakıya qayıdacaqlar. Velosipedçilər hər biri 12.3 kilometr olan 10 dövrə vurduqdan sonra yarış başa çatacaq. Bu mərhələdə sprinterlərə öz məharətlərini göstərmək üçün gözəl fürsət yaranacaq.
Qeyd edək ki, velotur Beynəlxalq Velosipedçilər İttifaqının (BVİ, fransızca UCI) təqvim planına daxil edilmiş və 2.2 U-23 (19-23 yaş həddi) kateqoriyasına aid BVİ kontinental turudur. Azərbaycanda ilk dəfə keçiriləcək peşəkar velosiped idmanı yarışına hər biri 6 idmançıdan ibarət olan və dünyanın ən müxtəlif ölkələrini təmsil edən komandalar qatılacaqdır.
Xəbər 1185 dəfə oxundu.