Göygöldə Uşaq Paralimpiya İdman Festivalına start verilib

İyunun 7-də “BP Azərbaycan” şirkətinin dəstəyi və Milli Paralimpiya Komitəsinin təşkilatçılığı ilə Göygöl şəhərində Azərbaycan Xalq Cümhuriyyətinin 110 illiyinə həsr olunmuş Uşaq Paralimpiya İdman Festivalına start verilib. Göygöl Olimpiya İdman Kompleksində keçirilən təntənəli açılış mərasimində rayon icra hakimiyyətinin başçısı Arif Seyidov, Milli Paralimpiya Komitəsinin prezidenti İlqar Rəhimov, “BP Azərbaycan” şirkətinin vitse-prezidenti Bəxtiyar Aslanbəyli, “Azercell Telekom” MMC-nin nümayəndəsi Sahilə İbrahimova, paralimpiya çempionları və idmansevərlər iştirak ediblər. Festivala Gürcüstandan və respublikamızın Bakı, Sumqayıt, Gəncə, Mingəçevir, Yevlax şəhərlərindən, Şəmkir, Şəki, Şamaxı, Ağdaş, Ucar və Ağstafa rayonlarından sağlamlıq imkanları məhdud 110 uşaq qoşulub. Əvvəlcə Azərbaycan və Gürcüstanın dövlət himnləri səsləndirilib. Tədbiri açan Milli Paralimpiya Komitəsinin prezidenti İlqar Rəhimov son illər respublikamızda idmanın bütün sahələrində olduğu kimi, paralimpiya sahəsində də beynəlxalq səviyyədə uğurlar qazanıldığını diqqətə çatdırıb. Azərbaycan Milli Paralimpiya Komitəsinin nəzdində Uşaq Paralimpiya Komitəsinin beynəlxalq təcrübədə ilk dəfə olaraq 2013-cü ildə yaradıldığını qeyd edən İlqar Rəhimov deyib ki, komitənin yaradılmasında məqsəd sağlamlıq imkanları məhdud uşaqların idmana cəlb olunması yolu ilə idmançıların hazırlanması və onların abilitasiya və reabilitasiya yolu ilə cəmiyyətə inteqrasiya olunmalarına dəstək verməkdir. Respublika üzrə Uşaq Paralimpiya İdman Oyunlarının 2015-ci ildən başlayaraq hər il keçirildiyini xatırladan İlqar Rəhimov bildirib ki, bu festivalda idmançılar cüdo, üzgüçülük, boccia, qolbol, stolüstü tennis, taekvondo, əlil arabasında idman rəqsi və pauerliftinq paralimpiya idman növləri üzrə mübarizə aparacaqlar. “BP Azərbaycan” şirkətinin vitse-prezidenti Bəxtiyar Aslanbəyli şirkətin həyata keçirdiyi sosial layihələrdən danışıb. O, şirkətin bu cür festivala dəstək verdiyinə görə qürur duyduğunu deyib. Göygöl Rayon İcra Hakimiyyətinin başçısı Arif Seyidov bu cür festivalların idman yarışından daha çox dostluq bayramı olduğunu vurğulayıb. Sonra idmançıların paradı keçirilib və bütün idman növləri üzrə final yarışlarına start verilib. Sonda festivalın qaliblərinə “BP Azərbaycan” şirkəti və Milli Paralimpiya Komitəsi tərəfindən medal və kuboklar təqdim olunub, çempionlara isə “Azercell Telekom” MMC tərəfindən mükafatlar verilib.

Xəbər 1138 dəfə oxundu.