Şəhriyar Məmmədyarov superturnirin dördüncü turunda Levon Aroyanla qarşılaşacaq

Azərbaycan qrossmeysteri Şəhriyar Məmmədyarov Norveçin Stavanger şəhərində keçirilən superturnirin üçüncü turunda rusiyalı şahmatçı Sergey Karyakinlə heç-heçə oynayıb. Rəqiblər 28-ci gedişdən sonra heç-heçə barədə razılığa gəliblər. Vişvanatan Anand - Din Lijen, Uesli So - Hikaru Nakamura, Maksim Vaşye-Laqrav - Fabiano Karuana partiyaları da sülhlə başa çatıb. Dünya şahmat tacının sahibi, norveçli şahmatçı Maqnus Karlsen 2,5 xalla turnirin lideridir. O, üçüncü turda erməni qrossmeysteri Levon Aronyana qalib gəlib. S.Karyakin, H.Nakamura, Ş.Məmmədyarov, Din Lijen, V.Anand, M.Vaşye-Laqrav və U.Sonun hər birinin aktivində 1,5 xal var. L.Aronyan və F.Karuana hərəyə 1 xal toplayıblar. “Altibox Norway Chess 2018” superturniri mayın 27-dən iyunun 8-dək keçiriləcək. Onun mükafat fondu 250 min avrodur. Turnirin qalibi 75 min avro, ikinci yerin sahibi 40 min avro, üçüncü yerin sahibi 25 min avro alacaq. Dördüncü turda aşağıdakı partiyalar oynanılacaq: Din Lijen – Fabiano Karuana, Sergey Karyakin – Maksim Vaşye-Laqrav, Şəhriyar Məmmədyarov - Levon Aronyan, Hikaru Nakamura -Maqnus Karlsen.

Xəbər 1260 dəfə oxundu.