Azərbaycan Dövlət Bədən Tərbiyəsi və İdman Akademiyasının stadionunda keçirilən atletika üzrə ölkə çempionatına mayın 26-da yekun vurulub.Çempionatda 15 klubdan 100-dən artıq atlet birincilik uğrunda mübarizə aparıb.
Atletikanın 25 növü üzrə keçirilən çempionatın ilk günündə qaçış, tullanma və atma yarışları təşkil olunub. Çempionatda Azərbaycan idmançıları ilə yanaşı, gürcüstanlı atletlər də iştirak ediblər.
Turnirin sonuncu günündə qadınlar arasında uzunluğa tullanma yarışlarında Nazan Əzməmmədli bütün rəqiblərini qabaqlayaraq fəxri kürsünün ən yüksək pilləsinə qalxıb. Səkkiz yüz metr məsafəyə qaçış yarışında Rəqsanə Rəcəbli qızıl medal qazanıb. Zəkiyyə Həsənova isə 800 metr məsafəyə qaçışda fərqlənib.
Kişilər arasında nüvəitələmə yarışında İsmayıl Əliyev, nizə atmada Orxan Qasımov, uzunluğa tullanmada Nazim Babayev birinci yeri tutublar.
Ələkbər Əzizov 200, İlham Abışov isə 800 metr məsafəyə qaçış yarışlarında qızıl medala layiq görülüblər.
Yarışın baş hakimi Ceyhun Hüseynov, baş katibi Natalya Kafarova, direktoru isə Kamal Əhmədov olublar.
Xəbər 1570 dəfə oxundu.