Futzal millimiz dünya çempionatına çıxa bilmədi

Bu il Tailandda keçiriləcək futzal üzrə dünya çempionatının Avropa zonası üzrə pley-off mərhələsində çıxış edən Azərbaycan milli komandası mübarizəni bir addımlıqda dayandırıb. İdman.com.az saytının məlumatına görə, "ay-ulduzlular"ımız bu gün Rusiya yığması ilə pley-off mərhələsinin cavab oyununu keçirib. Martın 27-də Bakıda keçirilən görüşdə 2:3 hesabı ilə uduzan yığmamız məğlubiyyətin əvəzini Tümendəki qarşılaşmada çıxa bilməyib. Tümendə baş tutan görüşdə ya ən azı 2 top fərqilə qalib gəlməli, ya da minimal fərqlə qalib gələcəyi halda 3-dən çox qol vurmalı olan komandamız bu vəzifənin öhdəsindən gələ bilməyib - 2:2. Tarixində ilk dəfə dünya çempionatının addımlığında olan millimiz bu uğursuzluğunda komandadakı itkilərin də rolu olub. Əsas heyət üzvlərindən qapıçı Andrey Tveryankin zədəli, Rizvan Fərzəliyev cəzalı olduğundan ilk oyundakı kimi bu qarşılaşmada da millimizə kömək edə bilməyib. DÇ-2012-nin pley-off mərhələsi Cavab oyunu 9 aprel Rusiya – Azərbaycan - 2:2 Qol: Nikolay Pereverzev, 5; Aleksandr Fukin, 22 - Serjao, 18, Jadder, 30 Hakimlər: Karel Heniç, Yan Kresta, Radek Venç (hamısı Çexiya) Hakim-inspektor: Antonius Van Eekelen (Hollandiya) UEFA nümayəndəsi: Zoran Dimiç (Serbiya) Tümen. Mərkəzi İdman Kompleksi İlk oyun – 3:2

Xəbər 934 dəfə oxundu.