Taekvondoçularımız Niderlanddan qələbə ilə dönüblər

Azərbaycan taekvondoçuları Hiderlandın açıq çempionatında (Dutch Open) uğurla çıxış ediblər. Taekvondo Federasiyasından idman.com.az saytına verilən məlumata görə, gənclər və böyüklər arasında A kateqoriyalı yarışda 1 qızıl, 3 gümüş və 3 bürünc medal qazanmışıq. Turnirin qalibi İlkin Şahbazovdan (74kq) başqa, böyüklər arasında Samir Aydınov (54 kq) bürünc mükafat qazanıb. Gənclərin yarışında Məcid Sofiyev (45 kq), Ayxan Tağızadə (55 kq) və Pərvin Əliyev (59 kq) ikinci yeri tutublar. Bürünc medalları isə Elmar Bədəlli (48 kq) və Ruslan Abbasov (51 kq) əldə ediblər. Eyndhovendəki mötəbər yarış, aprelin əvvəlində Misirin Şarm əl-Şeyx şəhərində gənclərin dünya çempionatına və mayın ilk günlərində İngiltərənin Mançester şəhərində böyüklərin Avropa çempionatına hazırlıqları baxımından da önəmli olub. Qeyd edək ki, olimpiya seçməsinin üzvləri martın 24-25-də İspaniyanın Alikante şəhərində açıq çempionatda (Spanish Open) iştirak edəcəklər.

Xəbər 1148 dəfə oxundu.