Bolqarıstanın “Lokomotiv” klubunun 2 futbolçusu karyerasını Azərbaycanda davam etdirə bilər. İdman.com.az saytı xəbər verir ki, Plovdiv təmsilçisinin oyunçuları Dakson və Serjinyo klublarımızın diqqət mərkəzinə düşüb.Belə ki, bolqar həmkarlarımızın iddiasına əsasən “Lokomotiv”in “Levski” ilə kubok oyununda azərbaycanlı futbol menecerləri də iştirak ediblər. Onların məqsədi bu cütlüyü bir daha izləyib danışıqlara start verməkdir. Lakin bu menecerlərin hansı klubun sifarişi ilə oyunçu axtardığı açıqlanmır.
27 yaşlı Sergio Filipe Dias Ribeyro (Serjinyo) Portuqaliyalı yarımmüdafiəçidir. Vətənində aşağı dəstə təmsilçisi “Pedras Rubras”, Yunanıstanda “Levadiakos” və “Pyerikos”, Bolqarıstanda “Vihren”in də şərəfini qoruyan orta sahə oyunçusu ötən ildən “Lokomotiv”dədir.
25 yaşlı Dakson Soares da Silva isə hücumameylli yarımmüdafiəçidir. Braziliyalı legioner 2006-10-cu illərdə də oynadığı “Lokomotiv”ə ötən il qayıdıb. Aradakı 1 illik fasilədə isə vətənində “Atletiko” (Kampo Qrande) klubunda oynayıb.
Xəbər 1141 dəfə oxundu.