Azərbaycan şahmatçıları Viktor Korçnoyun xatirəsinə həsr olunmuş turnirdə iştirak edəcəklər

Aprelin 12-17-də Sürixdə isveçrəli qrossmeyster Viktor Korçnoyun xatirəsinə həsr olunmuş “Kortchnoi Open 2017 Zurich” şahmat festivalı keçiriləcək. Festival çərçivəsində “Master” və “Main” (Open) turnirləri keçiriləcək. “Master” turnirində “A” qrupu iştirakçılarının ilkin start siyahısına 16 ölkədən 56 şahmatçının adı daxil edilib. Azərbaycanı Eltac Səfərli, Qədir Hüseynov və Məhəmməd İsmayılov təmsil edəcəklər. Turnirin reytinq-favoriti latviyalı Aleksey Şirovdur. Onun ardınca Eltac Səfərli gəlir. “Main” turnirində Azərbaycanın idman şərəfini Aysu İsmayılova qoruyacaq. Burada yeddi ölkədən 30-dan çox şahmatçı iştirak edəcək. Turnirdə vaxta yeni nəzarət tətbiq ediləcək: 45 dəqiqə, üstəgəl hər gediş üçün 30 saniyə. Festivalın sonuncu günü iştirakçılar blits-turnirdə güclərini sınayacaqlar. Vaxta nəzarət 10 dəqiqə, üstəgəl hər gediş üçün 5 saniyə olacaq.

Xəbər 710 dəfə oxundu.