Azərbaycan Respublikasının Prezidenti yanında Gənclər Fondunun dəstəyi ilə “İnnovativ Gənclər” İctimai Birliyi tərəfindən icra edilən “Qarabağ mübarizləri” layihəsi çərçivəsində Ağcabədi, Beyləqan, Bərdə, İmişli, Füzuli, Xocavənd və Tərtər rayonlarında idman yarışları keçiriləcək.Bu barədə Beyləqan rayon Gənclər Mərkəzində keçirilən seminarda məlumat verilib. Tədbir iştirakçıları əvvəlcə ümummilli lider Heydər Əliyevin və respublikamızın ərazi bütövlüyü uğrunda canından keçmiş Vətən övladlarının xatirəsini bir dəqiqəlik sükutla yad ediblər.
Tədbirdə çıxış edən layihə rəhbəri, “İnnovativ Gənclər” İctimai Birliyinin sədri Raul Əhmədov ölkədə həyata keçirilən gənclər siyasətindən danışıb. Layihə haqqında ətraflı məlumat verərək bildirib ki, əsas məqsəd region gəncləri arasında idman oyunlarının təşkil edilməsi ilə vətənpərvərlik ruhunun yüksəldilməsinə dəstək olmaqdır.
Çıxışlarda vurğulanıb ki, belə layihələr gənclərdə idmana marağı artırmaqla yanaşı, vətənpərvərlik hissinin yüksəlməsinə, onların zərərli vərdişlərdən uzaqlaşmasına dəstəkdir.
Xəbər 738 dəfə oxundu.