Şahin Diniyev : “Çempionatın sonunda bu xal bizə lazım olacaq”

Çempionatın “Kəpəz” – “Sumqayıt” oyunundan sonra Gəncə klubunun baş məşqçisi Şahin Diniyev mətbuat konfransında matçla bağlı fikirlərini bölüşüb: “Oyun gərgin şəraitdə keçdi. “Sumqayıt”la matçlarımız belə keçir. “Kəpəz”in heyətində böyük problemlər var, buna görə də əvəzedici komandadan futbolçular çağırmışdıq. Beş oyunçunun birdən-birə olmaması öz təsirini göstərir. İlk yarıda qol vəziyyətlərindən istifadə edə bilmədik, fasilədən sonra isə azlıqda qaldıq. Bundan sonra arxa xəttə fikir verməyə başladıq. Bu bir xal da, xaldır. Çempionatın sonunda bu xal bizə lazım olacaq. Çoxdan oynamayan uşaqlar meydançaya çıxmışdılar, məncə, pis oynamadılar. Cəzalı və zədəli olanlar heyətə qayıtdıqdan sonra komanda öz oyununu tapacaq və qələbələr olacaq. Kərimin ikinci sarı vərəqə almasına görə təəssüflənirəm. Sonuncu epizodda topa müdaxilə idi, sarını verməmək olardı. Qarşıdakı oyunlara ciddi hazırlaşmalıyıq”.

Xəbər 1004 dəfə oxundu.