Şahmat üzrə Azərbaycan milli komandası ikinci təlim-məşq toplanışına başlayıb

Bakıda keçiriləcək 42-ci Ümumdünya Şahmat Olimpiadasında iştirak edəcək Azərbaycan milli komandası intensiv məşqləri davam etdirir. Şəhriyar Məmmədyarov, Teymur Rəcəbov, Eltac Səfərli və Rauf Məmmədovdan ibarət əsas komanda 15 günlük hazırlıqda iştirak etmək üçün Qəbələyə yollanıb. Azərbaycan millisi Qəbələdə fransız qrossmeyster Etyen Bakronun rəhbərliyi ilə məşq edir. Hazırlıq barədə məlumat verən Etyen Bakro deyib: “Plana əsasən, ikinci təlim-məşq toplanışı 15 gün davam edəcək. Yığmanın üzvləri ilə yanaşı, həm debüt, həm də çətin kombinasiyaların həlli üzrə çalışacağıq. Ümumilikdə komandada əhval-ruhiyyə yüksək səviyyədədir. Hazırlıq üçün yaxşı şərait yaradılıb. Qəbələdə şahmatçılar həm də idmanla məşğul olurlar. Avqustda yığmanın növbəti təlim-məşq toplanışı keçiriləcək”. Qeyd edək ki, avqustda Azərbaycan millisinin yoldaşlıq görüşündə iştirak etməsi üçün danışıqlar aparılır.

Xəbər 647 dəfə oxundu.