UEFA Çempionlar Liqasında dörddəbir finalın sonuncu iki iştirakçısı müəyyənləşəcək

Martın 16-da UEFA Çempionlar Liqasının dörddəbir final mərhələsinin sonuncu iki iştirakçısı müəyyənləşəcək. Qarşılaşmalardan biri İspaniyada, digəri isə Almaniyada baş tutacaq. “Nou Kamp” stadionunda “Barselona” komandası “Arsenal”ı qəbul edəcək. Londonda “Arsenal”a iki cavabsız qolla qalib gələn katalon təmsilçisi cavab qarşılaşmasında yalnız cəzalı Jerard Pikenin xidmətlərindən məhrum olacaq. Qonaqların heyətində isə zədəli Peter Çex, Aleks Oksleyd-Çamberlayn, Tomaş Rositski, Santi Kazorla, Cek Uilşir, Loren Kosilnı və Mikel Arteta meydanda olmayacaqlar. Digər oyun isə Münxendə, “Alyans Arena” stadionunda keçiriləcək. İlk oyunda Turində “Yuventus” ilə qarşılaşmadan sülhlə ayrılan (2:2) “Bavariya” səfərdə vurulan qollara görə görüşün favoriti sayılır. “Qoca sinyora” isə mərhələ keçmək üçün səfərdən mütləq qələbə və ya böyükhesablı heç-heçə ilə ayrılmalıdır.

Xəbər 690 dəfə oxundu.