FIFA Yozef Blatter və Mişel Platini barəsində iş açıb

FIFA-nın Etika Komitəsinin Arbitraj Palatası qurumun prezidenti Yozef Blatter və UEFA-nın başçısı Mişel Platini barəsində iş açıb. “RİA Novosti” xəbər verir ki, bu barədə məlumat FIFA-nın rəsmi saytında verilib. Bəyanatda deyilir: “Arbitraj palatası məruzələri diqqətlə öyrənib və iki vəzifəli şəxsə qarşı rəsmi iş açmaq qərarına gəlib”. İsveçrə Federal Ədliyyə Bürosu (FOJ) da sentyabrın 25-də Y.Blatterə qarşı iş açıb. Y.Blatter 2011-ci ildə 2 milyon İsveçrə frankını qanunsuz olaraq M.Platininin hesabına köçürməkdə şübhəli bilinir. Pullar guya 1999-cu ilin yanvarından 2002-ci ilin iyununadək olan dövrdə işlərin görülməsinə görə M.Platininin hesabına köçürülüb. Fransalı mütəxəssis bildirib ki, həmin ödəmə müqavilə əsasında, qanuna tam müvafiq şəkildə həyata keçirilib. Xatırladaq ki, FIFA-nın Etika Komitəsi qurumun prezidenti Yozef Blatteri, baş katibi, daha əvvəl vəzifəsindən azad edilmiş Jerom Valkeni və UEFA-nın prezidenti Mişel Platinini oktyabrın əvvəllərində 90 gün müddətinə futbolla bağlı hər hansı fəaliyyətdən kənarlaşdırıb.

Xəbər 695 dəfə oxundu.