UEFA reytinqi: Azərbaycan mövqeyini qorudu

UEFA reytinq siyahısını açıqlayıb. Avrokubokların qrup mərhələsinin ilk turundan sonra cədvəldə cüzi dəyişikliklər olub. Komandası mübarizəni davam etdirən 28 ölkə təmsilçilərinin 3 gün davam edən oyunlarında iki Azərbaycan klubu da qüvvəsini sınayıb. Yunanıstan PAOK-u ilə evdə qolsuz heç-heçə edən “Qəbələ” ölkəmizin hesabına daha 0,250 xal qazandırıb. İngiltərədə “Tottenhem”ə 1:3 hesabı ilə uduzan “Qarabağ” isə reytinqə xal qazandırmayıb. Beləliklə, cari mövsüm əldə olunan xalımız 3,375-ə çatıb. Bu da ötən mövsüm qeydə alınan rekordumuzun (3,625) təkrarına daha da yaxınlaşdırıb. Bunun üçün qarşıdakı oyunlarda bir heç-heçə də kifayətdi. Çünki təsnifat və pley-offdan fərqli olaraq, əsas mərhələdə qələbə 0,500, heç-heçə 0,250 xal gətirir. Hesabımızdakı xalın 1,375-ni “Qəbələ” qazanıbsa, “Qarabağ” 1,000, “İnter” 0,750, “Neftçi” 0,250 xal gətirib. Son 5 mövsümün nəticəsinə görə hesablanan əmsalımız 13,875-ə çatıb. Bu isə Azərbaycan futbolu tarixində yeni rekorddu. Rekord irəliləməyimizə imkan verməsə də, 26-cı pillədəki mövqeyimizi qorumuşuq. Avropanın 26-cısı olan ölkəmiz 25-ci olan Şotlandiyadan 2,925 xal geri qalırsa, ən yaxın izləyicisi Serbiyanı 0,250 xal qabaqlayır. Bu isə o deməkdi ki, “Qəbələ” heç-heçə etməsəydi, bir pillə geriləyəcəkdik. Çünki xallarımız bərabər olacağı halda balkanlılar cari mövsümün nəticəsinə görə öndə qərarlaşacaqdı. Qeyd edək ki, Avropanın ən yaxşısı olan İspaniyanın hesabında 86,427 xal var.

Xəbər 724 dəfə oxundu.