“Lokomotiv” dünya çempionu ilə anlaşıb

Bakının qadın voleybolçulardan ibarət “Lokomotiv” klubu heyətini gücləndirməkdə davam edir. Ötən mövsüm “Çelenc Cup”ın finalınadək irəliləyən “dəmiryolçular”, bu rəqabətdə həmin turniri qazanmaq arzusunda olduqlarından, növbəti transferlərini gerçəkləşdiriblər. Komanda qış “transfer çərçivəsi”ndə Braziliyanın “Sollis Nestle” klubunun hücumçusu Yuliana Nasimento Kostanı heyətinə qatıb. 29 yaşlı voleybolçu ilə mövsümün sonunacan müqavilə imzalanıb. 184 sm boya malik Kosta bununla ilk dəfə vətənindən kənarda oynayacaq. O, “Sollis Nestle”dən öncə “Botafoqo”, “San-Kaetano”, “Rexona”, “Osasko” (“Sollis Nestle” əvvəlcə belə adlanırdı), “Ol Kampos”, “Brasil Telecom” və “Pinheyros” komandalarında forma geyinib. Dəfələrlə Braziliya çempionu və ölkə kubokunun sahibi olub. O, həmçinin “sambaçılar”ın heyətində gənclər arasında dünya çempionu adını qazanıb. Kosta ötən ilin sonunda klublararası dünya çempionatının qrup mərhələsində “Sollis Nestle”nin heyətində “Rabitə”yə qarşı oynayıb və məğlub olub. Lakin yekunda Braziliya təmsilçisi yarışın üçüncüsü adına yiyələnib. Yuliananın isə hətta yay “transfer pəncərəsi” çərçivəsində “Azərreyl”ə keçidi gündəmdə olub. Lakin son anda bu transfer baş tutmayıb.

Xəbər 1189 dəfə oxundu.