Gənc hokkeyçilərimiz AÇ-da ilk qələbələrini qazandılar

Azərbaycanın 21 yaşadək oğlan otüstü hokkeyçilərdən ibarət seçmə komandası Çexiya Respublikasınıın Hrades Kralove şəhərində keçirilən Avropa çempionatında dünən III turda Litva hokkeyçiləri ilə qarşılaşıb və 3:2 hesabı ilə qələbə qazanıb. İlk 2 turda Çexiya və Türkiyə hokkeyçilərinə müvafiq olaraq 1: 4 və 1:3 hesabı ilə məğlub olan yığmamız dünən Litva təmsilçiləri ilə görüşdə kifayət qədər üstün tərəf olsa da qələbə yalnız 1 top üstünlüklə ifadə olunub. Matçın 24-cü dəqiqəsində komandamızın kapitanı Kənan Şirinov çoxsaylı qol imkanlarının birindən istifadə edərək hesabı açıb.Tərəflər fasiləyə elə hokkeyçilərimizin 1:0 hesablı üstünlüyü ilə yollanıblar. İkinci hissə də həmyerlilərimiz üstün oyun nümayiş etdirərək 47-ci dəqiqədə hesabı 2:0-a çatdırıblar. Bu dəfə də Kənan Şirinov fərqlənib. Lakin, 3 dəqiqə keçmiş litvalılar hesab arasındakı fərqi yenə də 1 topa endiriblər. Sona 2 dəqiqə qalmış Anar Abdullayev yenidən komandamızın hesabda 2 top fərqlə irəlidə olmasına şərait yaradıb. Amma sonuncu dəqiqədə Litva hokkeyçiləri daha bir qol vuraraq matçın 3:2 hesablı qələbəsini rəsmləşdiriblər.Dünən III tur çərçivəsində keçirilən digər 2 oyun belə nəticələnib: Türkiyə - Slovakiya – 1:2(1:1) Çexiya – Cəbəllütariq – 4:3(3:0) Beləliklə, keçirdikləri 3 oyunun hamısını qələbə ilə başa vuran Çexiya hokkeyçiləri 9 xalla vahid liderdirlər. Rəqibindən 2 xal geri qalan Türkiyə komandası II yerdədir. Aktivində 4 xalı olan Slovakiya yığması III pilləni tutur. Azərbaycan idmançıları 3 xalla hələlik 4-cü yerdə qərarlaşıb. 2 oyunu heç-heçə və 1-ni məğlubiyyətlə başa vuran Cəbəllütariq təmsilçiləri V sıradadırlar. İlk 3 oyunda məğlub olan Litva komandası cədvəldə sonuncudur. Bu gün yarış iştirakçıları istirahət edir. Sabah IV tur çərçivəsində Azərbaycan yığması Slovakiya təmsilçiləri ilə qarşılaşacaq. Nəhayət, qitə çempionatının sonuncu günü-iyulun 26-da seçmə komandamız Cəbəllütariq hokkeyçilərini sınağa çəkəcək. Xatırladırıq ki, bu yarışda ilk 2 yeri tutan komanda Avropa çempionatının II divizyonuna vəsiqə qazanacaq.

Xəbər 939 dəfə oxundu.