Berti Foqts "DÇ-2014"dəki favoritlərini açıqladı

Azərbaycan milli komandasının baş məşqçisi Berti Foqts Braziliyada təşkil olunacaq dünya çempionatındakı favoritlərini açıqlayıb. Almaniya mətbuatına danışan B.Foqts ölkəsinin yığması ilə yanaşı, Braziliya və İtaliyanı da favorit gördüyünü bildirib: "Almaniya ilə yanaşı, Braziliya və İtaliya yığmalarını favorit görürəm. Favoritlər sırasında Fransanı söyləməyə çətinlik çəkirəm. Belçika mənə yaxşı komanda təsiri bağışladı. Həmçinin Çili yığması. Bizimlə oyunda onların yaxşı komanda olduğu görünürdü. İspaniya millisi son dünya çempionatında uğurlu çıxış etdi. Onlar son görüşdə də əla təsir bağışladılar. Ancaq siz ispanlara qarşı ispan futbolu oynaya bilmərsiniz. Onlara qarşı alman futbolu nümayiş etdirmək lazımdır. Topu ispanlardan daha yaxşı özündə saxlamaq lazımdır". Almaniyalı mütəxəssis eyni zamanda Avropa komandalarının dünya çempionu olmaq şanslarını dəyərləndirib: "Bütün avropalılar bu qitədə oynayan ən yaxşı cənubi amerikalı futbolçuları, braziliyalıları əla tanıyırlar. Məsələn, biz Neymar və Dantenin zəif və üstün cəhətlərini yaxşı bilirik. Avropalı məşqçilər Braziliyaya qarşı müdafiədə 4 futbolçu ilə necə oynamalı olduqlarını müəyyənləşdiriblər. Daha öncə Cənubi Amerika komandalarını tanımırdıq. İndi isə vəziyyət dəyişib və bu Avropa komandaları üçün əlavə üstünlükdür. Əgər indi Avropa komandası çempion olmasa, bir də heç vaxt dünya kubokuna sahib çıxmayacaq". Qeyd edək ki, Berti Foqts ABŞ yığmasının baş məşqçisi Yurgen Klinsmanın xüsusi məsləhətçisi kimi Braziliyada keçiriləcək dünya çempionatında iştirak edəcək.

Xəbər 878 dəfə oxundu.