Oktyabrın 17-də Hollandiyanın Rotterdam şəhərində boks üzrə qadınlar arasında Avropa çempionatı start götürəcək. 10 çəki dərəcəsi üzrə keçiriləcək yarışda Azərbaycanı 3 idmançı təmsil edəcək. Bunlar Ayzanat Hacıyeva (60 kq), Yelena Vıstropova (69 kq) və Leyla Cavadovadır (75 kq).
Qeyd edək ki, Vıstropova bu yaxınlarda Ukraynanın Nikolayev şəhərində keçirilmiş beynəlxalq turnirdə gümüş medala layiq görülüb. Avropa çempionatı 2500 tamaşaçı tutumuna malik “Topsportcentre” İdman Kompleksində təşkil olunacaq. Bu arena “Feyenoord” futbol klubunun ev oyunlarının keçirdiyi “De Kuip” stadionunun yaxınlığında yerləşir.
Qitə çempionatında ölkəmizi hakim kimi Olimpiya oyunlarının bürünc mükafatçısı Fuad Aslanov təmsil edəcək. Qadınlardan ibarət yığma komandamızın debüt edəcəyi Avropa çempionatına oktyabrın 22-də yekun vurulacaq.
Xəbər 1153 dəfə oxundu.