Taekvondoçumuz Avropa çempionatının gümüş medalını qazandı

Kiprin Pafos şəhərində keçirilən taekvondo üzrə gənclərin 18-ci Avropa çempionatının üçüncü günndə Azərbaycan milli komandasının kapitanı Hüseyn Mehrəliyev (59 kq) gümüş medal qazanıb. Əvvəlcə Viktor Varqaya (Macarıstan), Əli Nəgizə (Türkiyə), Robin Qranstroma (İsveç) qalib gələn H.Mehrəliyev yalnız Adam Xasarov (Rusiya) ilə final döyüşündə qələbəni əldən verib. Yarışın üçüncü günü mübarizə aparan digər iki taekvondoçumuza gəlincə, Təranə Məmmədova (44 kq) serbiyalı Mariya Vusetiçə, Elvin Əliyev (78 kq-dan yuxarı) türk idmançısı Uğur Ənsara məğlub olaraq turnirlə vidalaşıblar. Yarışın son günü qalan üç idmançımız yarışa qatılacaq. Milli komandamızın favoritlərindən, London Olimpiadasına vəsiqə qazanmış Fəridə Əzizova (68 kq) Anna Kersten ilə (Almaniya), Vladislav Subbotin (73 kq) Filip Majsen ilə (Xorvatiya), Seyidəzim Bədirxanlı (78 kq) isə İvan Plotnikov ilə (Rusiya) ilk döyüşə çıxacaq.

Xəbər 1165 dəfə oxundu.