21 yaşadək futbolçulardan ibarət yığma komandalar arasında Avropa çempionatı başa çatıb. İsraildə keçirilən turnirin final matçında İspaniya və İtaliya yığmaları qarşılaşıb.Yerusəlimdəki «Teddi» stadionunda baş tutan oyunda azarkeşlər qol şousuna şahidlik edib. 6 qolun vurulduğu oyunda ispanlar 4:2 hesablı qələbə qazanıb. İspaniyanın heyətində «Barselona»lı Tiaqo Alkantara het-trik (6, 31, 38-pen) edib, «Malaqa»lı İsko 1 qol vurub (66-pen). İtaliyanın qollarına isə «Ceona»nın üzvü Jiro İmmobile (10) və «Liverpul»un hücumçusu Fabio Borini (80) vurub.
Turnirin ən sərrast futbolçusu İspaniya yığmasının və «Real»ın üzvü Alvaro Morata olub. O, rəqib qapıçıları 4 dəfə məyus edib. Digər iki ispan – İsko və Tiaqo Alkantara hərəyə 3 dəfə fərqlənib.
Qeyd edək ki, İspaniya U-21-i tarixində 4-cü dəfə Avropa çempionu olub. İki il əvvəl də qızıl medallara sahib çıxmış ispanlar 1986 və 1998-ci illərdə də eyni uğura imza atmışdı.
Xəbər 884 dəfə oxundu.