Hələ heç nə məlum deyil
Klublarımızın qış fasiləsi – mövsümün həlledici mərhələlərinə hazırlığı həlledici dövründədir. Fevralın 9-da ölkə çempionatının birinci mərhələsinin 19-cu turu ilə yarış yenidən gündəmə gələcək. Hələliksə komandalar əyər-əskiklərini aradan qaldırmaq üçün son cəhdlərini edirlər. Lakin bu günə qədər klubların heyətə cəlb etdikləri oyunçulara, keçirdikləri oyunlara nəzər salsaq, hazırlığın əksər klublarda hələ indi başlandığını görmək olar. Halbuki indiki məqamda bu iş optimal formaya yaxınlaşmalıydı.
Çempion «Neftçi» çilili Xose Kabion və Kipr "Omonia"sının isveçrəli qapıçısı Conni Leoni ilə müqavilələr imzalayıb. Komanda Rusiya «Rotor»unun (1:0) ardınca Qazaxıstan «Aktobe»sinə 3:2 hesabı ilə qalib gəlib. Bu matçda onun əsas “vuran ayaq”ları Kanales və Nəsimovla yanaşı, Periko da fərqlənib. Makedoniya «Horizont Turnovo»su ilə görüşdə də Kanaleslə yanaşı, komandanın daha bir aparıcı üzvü - Flavinyu fərqlənib və hesab 2:1 olub. Sonra Rusiya «Amkar»ına 0:4 hesabı ilə uduzan kollektiv, Çinin «Quandun Jiçjitsyuan» komandası ilə heç-heçə (4:4 – qollar: Flavinyu-2, Araz Abdullayev-2) oynayıb.
Mövsümün lideri «İnter» Bolqarıstandan İvan Yovanovskini yeni fiziki hazırlıq məşqçisi kimi korpusa daxil edib. Komanda Almaniya aşağı divizionundan «İnqolştadt»a uduzub (1:3) və yeganə qolunu Daniel Genov vurub. Ardınca Ukraynanın Zaporojye şəhərinin “Metallurq”u ilə qolsuz heç-heçə edib. Qazaxıstan «Ordabaşı»sına 2:0 hesablı qələbədə qollarını Samir Zərgərovla, baxışa cəlb edilmiş seneqallı Müəmmar Ndiaye vurublar. Klub Türkiyədə son oyununda Polşa «Poloniya»sına 3:0 hesabı ilə qalib gəlib və qollardan ikisini yeni transferi Fomenko, birini Genov vurub.
«Simurq», əvvəlki illərdən fərqli olaraq, bu dəfə daha ciddi işlər görür. Klub Bolqarıstan paytaxtı Sofiyanın SSKA-sı ilə heç-heçə edib – 3:3 (Nicat Qurbanov, Stepan Polyak və Mario Bojiç). Komandanın Rusiya «Tom»u ilə görüşü də heç-heçə başa çatıb və bu dəfə klubun baxışa cəlb etdiyi Tomislav Buşiç fərqlənib. Xorvatiyanın Belupo şəhərinin "Slaven" klubuna 0:3 hesablı yenidgidən sonar, Rumıniya "Petrolul"una da uduzub - 1:2.
«Qarabağ» «Xəzər Lənkəran»ı tərk etmiş Branimir Subaşiçin də transferini həll edib. Ağdamlılar «Uralsk»dan sonra keçirdikləri iki oyunda Ukrayna “Hoverla”sına və Litva “Ekranas”ına eyni hesabla (1:3) məğlub olub. Sonrakı oyunlarda isə Makedoniya «Horizonte Turnovo»suna (0:0) və Moldova “Tiraspol”una (1:1 - Ansi Aqolli) qalib gələ bilməyəib, lakin Gürcüstan “Zestafoni”sini Bleda və Muərrəmin qolları ilə yenib – 2:0.
«Xəzər Lənkəran» yenə də özünəməxsusluqla fərqlənib. Klub yenicə müqavilə imzaladığı bildirilən İvan Çoviçlə anlaşmanı pozub və yenidən qapıçı axtarır. Bu dəfə Rumıniyanın “Qaz Metan” klubundan 27 yaşlı xorvatiyalı qapıçı Filip Lonçariçlə müqavilə bağlanıb. Klub transfer qiyməti 250 min avro dəyərləndirilən Marin Orşuliçi heyətə cəlb edib. 2-illik müqavilə imzalamış bu dayaq yarımmüdafiəçisi «Zaqreb»dən gəlib. Bukndan əlavə, Alvaro Silva və Antonio «Toni» Doblas Santana ilə 1,5 illik sazişlər imzalanıb.
Sparrinqlərdə Ukrayna “Krivbass”ının (0:6) və Rumıniya “Timişoara”sının (0:2) qapısına yol tapa bilməyən lənkəranlılar, Moldova “Zimbru”suna 2:1 hesabı ilə qalib gəlib və digər klublarımızla oyunlardan tanış «Eter”lə «sülh paktı» bağlayıb - 1:1.
«Qəbələ»nin axtarışları da bitir. Ötən həftə klub rumıniyalı Kristian Pulhak, nigeriyalı müdafiəçi İfeanyi Emeqara, həmçinin əvvəldən baxışda olan Luka Jinko və Mustafa Dabo ilə anlaşıb. Komanda Almaniya aşağı divizion təmsilçisi "İnqolştadt"a 3:4 (qollar: Rəşad Abdullayev, avtoqol və Kamanan) hesabı ilə uduzub, sonra Ukrayna “Volın”ına qalib gəlib - 2:1 (Kamanan və Mendi). «Qəbələ» Zaporojye "Metallurq"u ilə görüşdə yeni transferi Ceyhun Sultanovla hesabda önə keçsə də, yekunda sülhlə barışıb – 1:1. Komanda Rumıniya “Petrolul”unu 2:0 (Yannik Kamanan, Rəşad Abdullayev ), “Styaua”sını 1:0 (Dodo) hesabı ilə məğlub edərək, Moldova «Milsami»si ilə heç-heçə oynayıb - 2:2 (Şəhriyar Xəlilov, Viktor Mendi).
AzAL “Neftçi»ni tərk etmiş Saşa Yunusoğlunu heyətə qatmaq üzrədir. «Təyyarəçilər» son iki həftə ərzində Çin “Dalyan Aerbin”i ilə sülh bağlayıb - 1:1 (Andrius Veliçka), sonra Bolqarıstan “Eter”inə 1:0 (Orxan Həsənov), Finlandiya TPS-inə 4:0 (Nildu, Benuahi, Boqdanoviç, İqbekoyi), ardınca həmin hesabla Makedoniyanın “Horizonte Turnovo”suna (Benuahi-2, Tağım Novruzov, Orxan Həsənov) qalib gəlib.
«Bakı», türk əsilli hollandiyalı Fərdi Almazın və rumıniyalı hücumçu Marius Penyanın ardınca, 28 yaşlı ispaniyalı yarımmüdafiəçi Mario Martines Rubio ilə anlaşıb. Təlimləri yekunlaşdıran «Bakı» Xorvatiya “Osiyek”i ilə qolsuz heç-heçə edib. Bundan əvvəl bir gün ərzində iki matç keçirib və macar “Uypeşt”inə 0:2 hesabı ilə uduzaraq, Almaniya “Berqişqladbax”ına 1:0 hesabı ilə qalib gəlmişdi (Fərdi Almaz).
«Rəvan» ötən həftə Nodar Məmmədov, Ramil Həşimzadə və Emin Mustafayevlə müqavilə imzalayıb. Klub Polşa «Sunkar»ından gəlmiş serbiyalı Miloş Adamoviçi bəyənib. "Qaradağ-Lökbatan”la 1:1 hesabı ilə başa çatan görüşdə də qələbə topunu vurmuş futbolçu ilə müqavilə imzalanıb. «Bakı»nı tərk etmiş Ramazan Abbasov haqqında isə qərar yaxın vaxtlarda veriləcək. O, «Neftçala» ilə matçda bərabərlik qolunu vurub. «Sumqayıt»la matç da həmin hesabla yekunlaşıb. Bu matçla «Sumqayıt»ın da mövsümün qalan hissəsinə canlı hazırlığı başlanıb. Sumqayıt Azərbaycan U-21 millisinin sabiq yarımmüdafiəçisi Mirzağa Hüseynpuru da heyətə cəlb edib. Klub "Rəvan"dan sonra «Kəpəz»ə qalib gəlib - 1:0 (Sabir Allahquliyev).
Ötən həftənin ən sakit klubu «Turan» olub. Komanda yeni futbolçuları baxışdan keçirir. «Bakı»dan Elşad Manafov, Vüqar Bəybalayev və Ülvi Quliyev Tovuz klubunda icarə müddətində bacarıqlarını artırmağa çalışacaqlar.
Meydanın ot örtüyünə görə yeni arena seçməli olan Gəncə «Kəpəz»i də Bakıya üz tutub. Klub matçlar «Dalğa-arena»da keçirəcəyini açıqlayıb. O, bir neçə futbolçunu sınaqdan çıxarır və artıq ikinci yoxlama oyununu da keçirərək, «İnter»in əvəzediciləri ilə 2:2 hesabı ilə heç-heçə oynayıb. «Neftçala»ya qələbə topunu (1:0) baxışda olan Elgiz Kərimli vurub. Sonra komanda həmşəhərlisi «Tərəqqi» ilə iki dəfə sülh bağlayıb - 0:0 və 1:1. Klub üçün bir acı xəbər veteran üzvü Azər Məmmədovun karyerasını başa vurmasıdır.
BATI
19-cu tur
9 fevral (şənbə)
“Rəvan” (Bakı) – “Turan” (Tovuz)
AzAL (Bakı) – “Simurq” (Zaqatala)
“Kəpəz” (Gəncə) – “Neftçi” (Bakı)
10 fevral (bazar)
“Bakı” – “Sumqayıt”
“Qəbələ” – “Qarabağ” (Ağdam)
11 fevral (bazar ertəsi)
“Xəzər Lənkəran” – “İnter” (Bakı)
|
