UEFA Millətlər Liqası çərçivəsində iyunun 10-da "Dalğa Arena"da Azərbaycan - Slovakiya oyunu keçiriləcək.
Bununla bağlı təşkil edilən mətbuat konfransında baş məşqçi Canni De Byazi və komandanın üzvü Emin Mahmudov öz fikirlərini bildiriblər.
Canni De Byazi Qazaxıstan və Belarusla oyunlarda rəqiblərdən üstün və keyfiyyətli oyun nümayiş etdirdiklərini deyib. Baş məşqçi deyib: “Keyfiyyətli oyun nümayiş etdirdik. Təəssüf ki, hələ də qol vura bilməmişik. Baxmayaraq ki, kifayət qədər şanslarımız olub. Bu amil bizi məyus edir. Futbolda bu gün baş verməyən sabah nə vaxtsa gerçəkləşir. Bizi Slovakiya yığması ilə ağır oyun gözləyir. Onların Qazaxıstana məğlubiyyəti bizim üçün gözlənilməz oldu. Sabah qələbə qazanmaq üçün əlimizdən gələni edəcəyik”.
O əlavə edib ki, tənqidlərin olması normaldır. Hər kəs öz işini görür: “Çox dərinliyə getmək niyyətində deyiləm. Amma heç kim deyə bilməz ki, son iki oyunda pis çıxış etmişik. Futbolda bu gün uduzursan, hamı səni pisləyir. Ancaq bir qələbə qazanan kimi səni tərifləyirlər. Statistikaya baxırıq, indi burada iki qələbə haqqında da danışa bilərdik. Futbolda hər şey mümkündür.
Slovakiya millisi qrupumuzun ən güclüsüdür. Oyunçuların çoxu İtaliyada, İngiltərədə çıxış edir, yüksək keyfiyyətə malikdirlər. Oyunlarını analiz etmişik. Qazaxıstanla oyunda çoxlu qol imkanları olub, lakin dəyərləndirə bilmədilər. Qazaxıstan 11 nəfərlə sona qədər mübarizə apardı. Biz də sabah bu cür oynamalı və oyunu 11 nəfərlə tamamlamalıyıq. Lazımsız qayda pozuntuları etməməliyik".
Yığmanın oyunçusu Emin Mahmudov isə bildirib ki, komandanın meydana rahat çıxmağa haqqı yoxdur. Tam gücümüzlə mübarizə aparmalı, əlimizdən gələni etməliyik ki, qələbə qazanaq. İlk iki oyunda qalib gələ bilməmişik. Bu dəfə uğurlu nəticə üçün çalışacağıq.
“Bəzən şanssızlıq olur, bəzən rəqib qapıçılar yaxşı qurtarış edir. Bəzi epizodlarda da dəqiqlik çatmır. Ya son zərbə, ya da ötürmə dəqiq olmur ki, hücumu qolla tamamlayaq. Slovakiya millisinin Bakıya qalib və ya məğlub gəlməsinin heç bir əhəmiyyəti yoxdur. Onlar qələbə qazanmaq üçün yüz faizlik güclərini ortaya qoyacaqlar. Yeni baş məşqçinin rəhbərliyi altında oynayacaqlar. Ancaq biz də qələbə üçün əlimizdən gələni edəcəyik ki, onları məyus edək”.
|
