Ötən il Naxçıvan Muxtar Respublikası Yüngül Atletika Federasiyasının idmançıları ölkə və beynəlxalq səviyyəli yarışlarda 10 medal qazanıblar.
Bu barədə Naxçıvan Muxtar Respublikası Yüngül Atletika Federasiyasında ötən ilin yekunları və qarşıda duran vəzifələrlə bağlı keçirilən yığıncaqda qeyd olunub.
Federasiya sədri Rövşən Məmmədov yığıncaqda çıxış edərək bildirib ki, 2019-cu ildə idmançılar 3 beynəlxalq, 3 ölkə, 3 muxtar respublika əhəmiyyətli və 13 rayon birinciliyində öz güclərini sınayıblar. Ötən il ərzində federasiyanın tərkibində “Rabitəçi” və “Marafon” idman klubları da daxil olmaqla, 84 qrup fəaliyyət göstərib. Qrup məşqlərində və yarışlarda iştirak edən idmançıların sayı 1208 nəfər olub ki, bunların 579-nu qızlar, 639-nu isə oğlanlar təşkil edib.
Diqqətə çatdırılıb ki, muxtar respublikanın Gənclər və İdman Nazirliyi tərəfindən federasiyanın idmançısı Əmrah Nağıyevə “İlin ən yaxşı idmançısı” mükafatı təqdim edilib. Uğurlarla yanaşı, federasiyanın işində nöqsanlar da az deyil, bu nöqsanların aradan qaldırılması istiqamətində işlər gücləndirilməlidir.
Gənclər və İdman naziri Azad Cabbarov çıxışında bildirib ki, muxtar respublikada gənclərin idmana cəlbi, onlara sağlam həyat tərzinin aşılanması diqqət mərkəzində saxlanılır. Yüngül Atletika Federasiyası da 2019-cu ildə öz işini verilmiş tapşırıqlara əsasən qurub. Muxtar respublikada bu idman növünün inkişafı üçün yaradılan şəraitin nəticəsidir ki, artıq bu gün Naxçıvanda yüngül atletikanın 244 qrupu fəaliyyət göstərir ki, bu qruplarda 3508 nəfər idmanın bu növü ilə məşğul olur. Gənclər və İdman naziri çıxışının sonunda idmanın inkişafına göstərdiyi diqqət və qayğıya, yaradılan şəraitə görə muxtar respublika rəhbərinə minnətdarlığını bildirib.
Sonra çıxışlar olub.
|
