BATI YAR | batyyar@mail.ru
Azərbaycanı Avropa kuboklarında təmsil edəcək futbol klubları yeni mövsümün hazırlıqlarına başlayıblar. Gözlənildiyi kimi, 4 "Avropa standartlı"dan "Qəbələ" üçün yarış ən mürəkkəb ssenarilərdən biri ilə keçəcək.
Mövsüm bitən kimi klub, əsasən, öz yetirmələrinə güvənəcəyini elan edib. Bununla yanaşı, bir neçə transfer də mümkündür, deyilib. Artıq komandada ənənəvi yay yarpaq tökümü başlanıb. Cavid Hüseynovla Elvin Camalov "Zirə"ni seçiblər. Rauf Əliyev, Stiven Cozef-Monroz və Voyislav Stankoviç "Neftçi"də qərarlaşıblar. Komandanı İlqar Qurbanov, Lalavele Atakora və Sabien Lilay da tərk edib. Bu şəraitdə Kamal Mirzəyevlə "Zirə"dən Sadiq Quliyevin transferinin gedənlərlə tərəzi ölçüsü müqayisə oluna bilməz.
Komanda ötən bazar günü, digər 3 Avropa təmsilçimizdən ən axırıncı olaraq, təlimlərə başlayıb. Qəbələdən sonra klub Bakıda məskunlaşacaq və hazırlıqların birinci mərhələsini "Zirə" ilə yoxlama qarşılaşmasında başa vuracaq. İyulun 4-də kubokun sahibi Türkiyəyə üz tutacaq və ayın 18-nə qədər tam hazırlığı başa vurmağa çalışacaq. 3 yoxlama matç planlaşdırılır. Biri iyulun 7-də Ukrayna "Mariupol"u ilə olacaq. Ayın 12-də və 17-dəki rəqiblər hələ bəlli deyil.
Avropa liqasında ölkəmizi təmsil edəcək və vaxtilə qrupda mübarizə aparmış bir klub strategiyasını, baxışını dəyişsə də, birinci diviziondan Oruc Balaşlı, İlqar Ələkbərov, Eyyub Əliyev və Murad Musayevi baxışa cəlb edib. Bu baxış məsələsi ölkəmizin ən böyük futbol xəstələyinə çevilib. Üstəlik, nə qədər maliyyə durumu yaxşı olmasa belə, Avropa liqasına gedən ərəfədə futbolçunu baxış üsulu ilə çeşidləmək qeyri-peşəkarlıq əlamətidir. Hər halda, ümid edək ki, komanda bu heyətlə əsl mübarizlər kimi yalnız mərhələ barədə düşünəcək.
Sabitqədəm görünən "Qarabağ"ı da, açığı, nə gözlədiyi bilinmir. Klub yenə futbolçu seçimində konkretlik göstərmir. Komandanı Yakub Jezniçak, İnnosent Emeqara, Reynaldu Silva və Con Delarjın tərk etdiyi məlumdur. Nicat Süleymanov isə icarə əsasında "Zirə"yə göndərilib. 10 gündür məşqlərə başlamış kollektiv dünən "Səbail"lə yoxlama matçdan sonra 3:1 (Dani Kintana, 12, Filip Ozobiç, Tural Bayramov//Fəhmin Muradbəyli) Türkiyəyə üz tutub. İyulun 2-dək komandanın qarşılaşacağı rəqiblər bəllidir: ayın 22-də "Ludoqorets" (Bolqarıstan), 25-də Krayova "Universitatya"sı (Rumıniya), 28-də "Ufa" (Rusiya) və Plzen "Viktoriya"sı (Çex Resp.). Ağdam klubunun transferləri sırasında daha iki futbolçunun adı hallanır. Lakin hələ konkretlk olmadığından transferləri süzgəcdən keçirmək də doğru olmaz. Lakin "Qarabağ"ın ötənilki səhvləri təkrarlamaması vacib şərtdir. Çünki yalnız bu yolla komandanın hazırlığını optimal həddə çatdırmaq və ən əsası, yeni simasını qurmaq olar.
Ötən mövsümün sonunda başı daşa dəymiş və özünü doğrultmaq üçün çalışmalı olan "Neftçi" ilə Avrodebütant "Səbail" hələlik daha çox fəallıq göstərirlər. Lakin bu fəallıq lokal xarakterli yeniləşmə üzərində qurulub. Bununla belə, "Neftçi" ölkə səviyyəsində daha ciddi futbolçuların transferi ilə məşğul olub. Geri dönmüş Dariu Frederiku ilə yanaşı, kluba "qəbələlilər" gəliblər: Rauf Əliyev, Voyislav Stankoviç və Stiven Cozef-Monroz. Bu futbolçuların "ağ-qaralar"ın oyun sxeminə uzlaşması mümkündür. Lakin klubda daha sanballı bir heyət quruculuğuna ehtiyac var. Hələlik, bu baş vermədiyindən hazırlıq dövrü ilə ölçüb-biçmək məcburiyyəti yaranıb. Heyəti Məhəmməd Mirzəbəyov, Qoran Paratski, Petru Raku, Canluka Sansone tərk ediblər. Ruslan Abışov isə "Sabah"ın şərəfini qoruyacaq. Bu arada "Neftçi" qapıçısı Səlahət Ağayevin gedişinin qarşısını ikiillik müqavilə ilə alıb. Yeri gəlmişkən, klub futbol akademiyasının 56 yaşlı ingiltərəli rəhbəri Mik Benetlə də müqaviləni bir il müddətinə uzadıb. Yaxşı cəhətlərdən biri kimi, "Neftçi" ölkə xaricində hazırlığını erkən başlayıb. İyunun 10-dan fiziki hazırlıq üzərində çalışan kollektiv təlim-məşqini plan üzrə Türkiyədə davam etdirəcək.
"Səbail" yeni mövsümə fərqli ovqatla daxil olmaq istəyir. Əlbəttə, bu fərqlilik ən əvvəl Avrokubok prizmasından qiymətləndirilməlidir. Ölkə çempionatına gəlincə, komanda "Qəbələ"nin zəifləyəcəyini ehtimal edərək, daha vüsətlə güclənməyə meyilli olmalı və "Neftçi" ilə "Qarabağ"a şərik olmaq üçün çalışmalıdır. Bir sözlə, daha sanballı heyət qurmaq əsas vəzifələrdən olmalıdır. Buna isə komandanın nə qədər nail ola biləcəyini transfer bazarı ilə ölçmək olar. Klubu karyerasını bitirmiş Fərhad Vəliyev, həmçinin Tome Kitanovski, İmanol İbireri, Enrike Perilyu, Tamazi Setsxladze və Ruslan Qurbanov tərk ediblər. Alınanlar sırasında Kamal Bayramov və Dilan Duventru (hər ikisi - "Zirə"), Ürfan Abbasov ("Qəbələ"), Turan Manafov ("Zaqatala") ilə yanaşı, Makedoniya "Rabotniçki"sindən gətirilmiş Daniel Bojinovskinin adı diqqət çəkir. Komandada Rahid Əmirquliyev, Vüqar Bəybalayev, Ağabala Ramazanov, Şəhriyar Rəhimov və Aleksandr Rıbkanın qalması yeni müqavilələrlə möhkəmləndirilib. Bu arada, futbol baxımından daha çox gələcək bizi maraqlandırdından klubun baş məşqçisinə kömək edəcək Emin Ağayev, Yaşar Hüseynov, Fərhad Vəliyev və Toni Boqdanovski ilə sazişlərin artırılması ilə yanaşı, 42 yaşlı Yan Yaap Şmaalın klubun futbol akademiyasına yeni direktor təyin olunmasını qeyd etməliyik.
"Səbail" hazırlığına da digər klublardan fərqli yanaşıb. "Qarabağ"a uduzaraq (1:3) səfərə çıxmış klub Bolqarıstanın Bransko şəhərinə yollanıb və iyulun 2-dək burada qalaraq 4 yoxlama oyununda qüvvəsini sınayacaq. Bunlar Plovdiv "Lokomotiv"i (21 iyun), "Beroe" (25 iyun), Rumıniya "Akademika Klinçeni" (28 iyun) və "Makedoniya Qyorçe Petrov"dır (1 iyul).
Transferlərindən fərqli olaraq, klub rəqiblərini məhz Avrokubok prizmasından ilk tura hazırlıq baxımından optimal və hər tipə müvafiq seçə bilib. Bu isə ümidvericidir. Lakin komandanın qarşısında qoyulmuş əsas vəzifəni hələ tam müəyyən etmək mümkün deyil və buna görə də təxminlərdən danışmaq yersizdir. Amma bilinən odur ki, daha irəli nəzər salmaq üçün transferlərin daha ciddi və sanballı olmasına ehtiyac var.
Ümumən, hər Avrokubok təmsilçimizlə bağlı hər şey aşağı-yuxarı əvvəldən məlumdur. Bu dəfə də əsas ümid naməlumlaşmış "Qarabağ"adır. Amma bu o demək deyil ki, "Neftçi" də məsuliyyətdən kənardadır və əsas vəzifəsi qrupda yer almaq olmalıdır. "Səbail"in indiki halı ilə bir-iki mərhələ prinsipi ilə vuruşması mümkün ola bilər. Ancaq bu və ilk dəfə bu yarışa qoşulması ona klublarımızın ənənəvi təbiri ilə bir mərhələ ilə kifayətlənməyə əsas verməyəcək. "Qəbələ" də əsl olimpiya devizi - "əsas iştirakdır" yolunu tutmamalıdır. Tarixində ilk dəfə bu səviyyəyə nailiyyətlə gəlib çatmış klub öz təpərini fərqli yolla göstərmək üçün qığılcımdan od törətməyə çalışmalıdır. Bunun üçün keçənilkindən fərqli olaraq, komandanın bu dəfə bir azacıq inad göstərməsi böyük hay-küylə yeni "Qəbələ"nin təməlini qoya bilər. Axı, həm də yerində sayan futbolumuz üçün hər belə uğur cüzi ümid işığı olur.
BATI YAR
|
