Əsas məqsəd Britaniya təcrübəsini bölüşmək idi
“İnkişaf naminə İdman” İctimai Birliyi ölkəmizdə beynəlxalq İdman Həyəcanı İrsinin 2 illik yubileyi münasibət ilə tədbirlərə start verib. Tədbirə Birləşmiş Krallıqdan dəvət olunmuş mötəbər qonaqlar da qatılıblar. Onların arasında dünya şöhrətli atlet Kolin Jekson və İngiltərə Futbol Assosiasiyasının sabiq icraçı direktoru, tanınmış idman jurnalisti Devid Devis, həmçinin “Beynəlxalq İdman Həyəcanı” proqramının regional rəhbəri Elayas Musanqeya da var.
Tədbirlər çərçivəsində dünən müxtəlif KİV qurumlarını təmsil edən idman jurnalistləri üçün birgünlük seminar keçirilib. Cənab Devisin apardığı bu toplantı Milli Olimpiya Komitəsinin konfrans zalında baş tutub.
BP Azərbaycan şirkətinin maliyyə dəstəyi ilə təşkil olunan seminarın mövzusu idman reportyorluğu və meqa idman tədbirlərinin işıqlandırılması idi. Əsas məqsəd böyük idman tədbirlərinin, o cümlədən, olimpiya və paralimpiya oyunlarının daha maraqlı və yaradıcı işıqlandırılması üçün Britaniya təcrübəsini bölüşmək və jurnalistlər arasında məlumat mübadiləsi üçün şərait yaratmaq olub.
Tədbirin əvvəlində “İnkişaf naminə idman” İctimai Birliyinin rəhbəri Mehman Kərimov seminarın məqsədi barədə qısa məlumatdan sonra sözü Devid Devisə verib. Qonaq olimpiya və paralimpiya oyunlarının tarixi barədə danışıb, idman yarışlarının işıqlandırılması və təkmilləşdirilməsi istiqamətində məruzələr edib. Azərbaycana 3-cü dəfə səfər etdiyini vurğulayan Devis, bundan cox məmnun qaldığını deyib: “İlk dəfə ölkənizə 2005-ci ildə gəldim. O zaman milli futbol komandanız İngiltərə yığmasını qəbul edirdi. Yadımdadır, oyun ərəfəsində Bakıya güclü sulu qar yağırdı. Küləyin sürəti isə inanılmaz idi. Təklif etdik ki, qarşılaşma təxirə salınsın. Amma FİFA prezidenrti Yozef Blatter bunun əleyhinə çıxdı. Həmin matçda biz minimum hesabla qalib gəldik. Düzünü desəm, bəxtimiz də gətirdi. Mənə xoş təsir bağışlayan məqam stadionun qarşısında ucalan, 1966-cı ildə İngiltərədə keçirilmiş dünya çempionatının finalında hakimlik etmiş Tofiq Bəhramovun abidəsini görmək idi. O, çox ədalətli referi olub. Məhz onun düzgün rəyi sayəsində biz çempion olduq. Kecən il isə AFFA-nın 100-illik yubileyində iştirak edirdim”.
bp-Azərbaycan şirkətinin nümayəndəsi Tamam Bayatlı, öz növbəsində bildirib ki, onun çalışdığı qurum Londonda keciriləcək olimpiya və paralimpiya oyunlarına hazırlaşan milli komandalarımıza və bir qrup secilmiş idmançıya dəstək vermək üçün ötən həftə Milli Olimpiya Komitəsi və Milli Paralimpiya Komitəsi ilə tərəfdaşlıq müqaviləsi imzalayıb. Bu, 1992-ci ildən Azərbaycanda fəaliyyət göstərən bp şirkətinin öz 20-illiyini qeyd etdiyi bir vaxta düşüb: “Şirkət 3 olimpiya - Cəbrayıl Həsənov (sərbəst güləş), Fəridə Əzizova (taekvondo), Rövşən Bayramov (yunan-Roma güləşi) və 4 paralimpiya idmançısı - İlham Zəkiyev, Afaq Sultanova (hər ikisi - cüdo), Oloxan Musayev, Oleq Panyutindən (atletika) ibarət bu qrupun həm London oyunlarına hazırlığını, həm də yarışlarda iştirakını dəstəkləyəcək”.
Seminar zamanı “Beynəlxalq İdman Həyəcanı” Proqramı və London Yay olimpiya və paralimpiya oyunlarına hazırlıqla bağlı videoçarxlar da nümayiş olunub.
Praktiki hissədə London paralimpiya oyunlarına lisenziya qazanmış cüdoçular - ikiqat paralimpiya çempionu İlham Zəkiyev və Afaq Sultanova ilə görüş keçirilib. ATV telekanalında çalışan həmkarımız Sənan Şəfizadə və BBC-nin sabiq reportyoru Devid Devis onlardan 5-dəqiqəlik nümunə müsahibələri götürüblər.
Qarşılıqlı fikir mübadiləsi şəraitində keçən seminarda fərqlənmiş jurnalistlərə sertifikatlar təqdim olunub.
Tədbirlər proqramının ikinci günündə, sabah Kolin Ceksonun və Azərbaycanın tanınmış idmançılarının qatılacağı görüşlərlə zəngin olacaq. Həmin gün İctimai Televiziya və Radio Yayımları Şirkətinin “Yeni gün” səhər proqramında iştirakdan sonra qonaqlar Gənclər və İdman Nazirliyinin, həmçinin Milli Olimpiya Komitəsinin rəhbərliyi ilə görüşəcəklər. Daha sonra Respublika Olimpiya Mərkəzində yeniyetmə və gənc atletlər üçün sprint və maneələrlə qaçış üzrə master klass nümayişi olunacaq. Günün ikinci yarısında Sumqayıt Paralimpiya Kompleksində tədbir keçiriləcək. Burada Milli Paralimpiya Komitəsinin rəhbərliyi ilə görüşdən sonra, qonaqlar gənc idmançılarla söhbət edəcək və Bakı şəhər 27 saylı orta məktəbi və Azərbaycan Atletika Federasiyasının “İnkişaf naminə idman” təşkilatı ilə birgə tipik və əlilliyi olan uşaqlar üçün təşkil edilmiş şən və inklusiv oyunlara qatılacaqlar.
İki günlük tədbirlər proqramı Azərbaycan idmançılarının və britaniyalı qonaqların şərəfinə təşkil edilən ziyafətlə başa çatacaq. Ziyafətdə Beynəlxalq İdman Həyəcanı proqramının son iki ildə uğurlu və davamlı fəaliyyətində yaxından iştirak etmiş və ona dəstək vermiş Milli Olimpiya və Milli Paralimpiya komitələri, idman federasiyaları, Təhsil Nazirliyinin rəsmiləri, olimpiyaçılar və paralimpiyaçılar, idman federasiya və qeyri-hökumət təşkilatları rəhbərləri, beynəlxalq təşkilat və diplomatik korpusların nümayəndələri iştirak edəcəklər.
Kamran HACI
|
