Topaz Premyer Liqanın sonuncu turu çərçivəsində keçirilən "Rəvan" - "Qarabağ" matçında diqqətçəkən məqamlardan biri meydan sahiblərinin futbolçusu Novruz Məmmədovun kapitan sarğısını qoluna keçirməsi olub.
İdman.com.az-ın klubun rəsmi saytına istinadən verdiyi məlumata görə, 23 yaşlı müdafiəçi Ramazan Abbasov və Rəşad Abdullayevin yoxluğunda sarğını qoluna taxıb.
Belədə Məmmədov cari mövsüm "Rəvan"ı kapitan kimi meydana çıxaran 3-cü futbolçu olub. Daha öncə məhz Abbasovla (3 oyun) Abdullayev (2 oyun) fərqlənmişdi.
Ümumilikdə isə Novruz Premyer Liqada "Rəvan”ı kapitan kimi meydana çıxaran 8-ci futbolçu olub. Elitada 70 oyun keçirmiş komandada buna qədər Miloş Zeçeviç (49 oyun), Tural Axundov (10), Ramazan Abbasov (4), Əkrəm Hodziç, Rəşad Abdullayev (hər ikisi 2), Davud Kərimi və Nodar Məmmədov (hər ikisi 1) oyuna "sarğı” ilə başlamışdı.
Premyer Liqada ilk dəfə kapitan olmaq şərəfinə layiq görülmüş Novruz Məmmədov məsələ ilə bağlı klubun rəsmi saytına danışıb. Buna qədər "Muğan” I divizionda oynayarkən kapitan olmuş "21” nömrəli futbolçu bunları deyib:
"Mənim üçün də bir qədər gözlənilməz oldu. Yəqin məşqçilər vaxtilə bu komandada oynamağımı nəzərə alıb "sarğı”nı mənə etibar etdilər. Ramazan Abbasov və Rəşad Abdullayev oynamırdı deyə, mən seçildim. Bizim əsas kapitanımız bəllidir – Ramazan Abbasov. Sadəcə, o və vitse-kapitan meydanda olmadığından bu məsuliyyətli iş mənə həvalə olundu. Əlbəttə, kapitanlıq sarğısı məsuliyyəti və təzyiqi artırır. Amma çalışdım ki, bunun mənə təsir etməsinə imkan verməyəm. Sadəcə, öz oyunumu oynayırdım. Onsuz da hər oyuna məsuliyyətlə yanaşmaq borcumuzdur. Bütün komanda işə məsuliyyətlə yanaşır”.
Məmmədov "Qarabağ”la oyunla bağlı fikirlərini də bölüşüb: "Çətin oyun olacağını bilirdik. Axı "Qarabağ” kimi güclü komandaya qarşı mübarizə aparırdıq. Əlimizdən gələni etdik. Son dəqiqələrdə qol buraxmağımız isə çox üzücü oldu. Bu məqama əsasən 2 xal itirdiyimizi söyləyə bilərəm. Amma ümumən oyuna görə qənaətbəxş nəticə əldə etdik. Sadəcə, 1:0 olsaydı, lap əla olardı”.
Sonda Novruz "Qəbələ” ilə qarşıdan gələn matçla bağlı danışıb: "Məncə, "Rəvan” artıq özünə gəlib. Biz hər keçən oyunda daha yaxşı oynayırıq. Bu ənənəni Qəbələdə də davam etdirmək niyyətindəyik. İndi çempionatda hər oyun çətin olur. Son 2 oyundakı kimi mübarizə aparmalıyıq. Hər halda, mütləq meydanda sona qədər döyüşmək lazımdır. Ümidvaram ki, Bakıya sərfəli nəticə ilə dönəcəyik”.
|
